Bankada FRETILIN fó apresiasaun ba inisiativa F-FDTL halo “Tour FALINTIL 2020”

DILI, 21 agostu 2020 (TATOLI) -- Bankada Frente Revolusionária Timor-Leste Indepedente (FRETELIN), hato’o apresiasaun ba inisiativa FALINTIL-Forsa Defeza Timor-Leste (F-FDTL) ne’ebé halo “Tour FALENTIL 2020” hodi la’o haleu munisípiu 12. Tour FALINTIL ne’ebé ne’ebe involve membru F-FDTL hamutuk na’in-450 ne’e, atu halo reflesaun ba istória luta FALINTIL nian.

“Tour FALINTIL refere ho kareta, motor envolve membru F-FDTL hamutuk na’in-450, hodi haleu munisípiu 12 tuir rejiaun ida-idak. Objetivu hosi asaun Tour FALINTIL 2020 ne’e atu halo reflesaun ba istória luta FALINTIL nian ne’ebé komemora ninia anivesáriu ba dala-45 (20 agostu 1975-20 agostu 2020),” haktuir nota komunikadu hosi Bankada FRETILIN ne’ebé Agência TATOLI asesu, foin lalais ne’e.

Asaun ida ne’e, hanesan aktu simbóliku hodi sama tuir fali FALINTIL nia ain-fatin, ne’ebé durante tinan 24 nia-laran reziste hasoru okupasaun Indonézia, halo lakon nafatin povu Maubere nia vontade no hakarak ba ukun rasik-aan.

“Tanba ida ne’e FRETELIN konsidera, nu’udár aktu istóriku hodi valoriza ezemplu ne’ebé Prezidente Komité Sentrál FRETELIN nian no komadante Xefe Forsa Armada Libertasaun Nasionál Timor-Leste, Saudozu Nicolau Loubato dos Reis ho lema “Mate ka Moris Ukun RasikAn”, hatudu dalan no mate eroi iha campo batalha, ohin loron ita goja,” nota ne’e hateten.

Bankada FRETELIN Konsidera Tour FALENTIL nu’udár fonte ida fó inspirasaun ba timoroan hotu, hodi bolu atensaun ba terus na’in sira, funu na’in, ukun-na’in timoroan, atu labele haluha ita-nia prinsípiu sira, ita-nia diresaun no husik ita-nia eroi sira lakon leet de’it ho ita-nia istória, maibé hatutan nafatin funu ne’ebé sira hahú brani (hanesan mós sira) atu hatudu dalan ba hametin ukun rasik-an.

Ne’e duni, Tour FALENTIL hanesan reflesaun hodi fó onra no glória ba saudozu sira ne’ebé lori sira-nia isin, raan no ruin ne’ebé naklekar iha tasi, iha tetuk, iha foho Cablaki, Matebian, Ramelau, no iha mota kadalak sira, hodi sosa patria libertasaun no liberdade.

Ba okaziaun ida-ne’e, Bankada FRETELIN apela ba jerasaun foun sira atu buka hatene no hametin nafatin valor prinsípiu no sakrifísiu sira ne’ebé povu Maubere hamutuk ho FALINTIL sira hatudu iha tempu funu hodi hetan indepedénsia.

“Ba ita hotu liuliu ba jerasaun foun timoroan, Buibere no Maubere hotu, atu buka hatene nafatin no hametin ba beibeik iha ita-nia neon, valor prinsípiu no sakrifísiu sira ne’ebé povu Maubere hamutuk ho FALINTIL hatudu iha tempu funu hodi hetan indepedénsia. Tanba ne’e, urjente tebes atu hamoris, harii hametin, haburas, no habelar fila-fali valor prinsípiu sira atu hametin unidade nasionál ba konsolidasaun indepedénsia Repúblika Demokrátika Timor-Leste (RDTL),” nota komunikadu ne’e hateten.

Tanba indepedénsia la signifika de’it livre hosi okupasaun estratéjia maibé indepedénsia ida ne’ebé aspira maka indepedénsia polítika no indepedénsia ekonómia ba RDTL nian. Konsiste katak sei iha luta naruk iha oin ho dezafiu no obstákulu barak atu hasai povu hosi obstakurantizmu, ki’ak no mukit.

“Ohin loron ita dezafiu ida tana maka oinsá proteje ita-nia povu ninia saúde hosi surtu COVID-19, ne’ebé afeta mós ba povu barak ninia kondisaun sósiu ekonómika, povu barak maka tenke lakon sir-nia fonte rendimentu,” koamunikadu impensa ne’e haktuir.

Hosi sirkunstánsia hirak ne’e dala ita tan merese atu elojia Tour FALENTIL, tanba hto’o mós asaunn sira hanesan fó apoiu hahan ba família kbiit laek balun, fó tratamentu saúde gratuita, fahe maskara hodi sisializa regra hasoru COVID-19 nian. Ida-ne’e hanesan ezemplu ne’ebé di’ak ba ita sidadaun hotu atu bele banati tuir, hodi luta no halo prevensaun ba ita-nia an no ita hotu, nu’udár povu no nasaun.

Jornalista: Evaristo Soares Martins | Editór: Cancio Ximenes