DILI: Atu diginifika veteranu
sira ne’ebé luta durante tinan 24, governu Timor-Leste preve ona orsamentu
harii uma 60 ba veteranus iha proposta Orsamentu Jeral Estadu (OJE) 2021.
Prezidente Konsellu Kombatente
Libertasaun Nasionál (KKLN) Riak Leman hatete, Ministériu asuntu Kombatentes
Libertasaun Nasional mós tau ona orsamentu ba 2021 hodi halo uma 60 ba veteranu
sira ne’ebé luta tinan 24, barak liu husi Lospalos, Vikeke, no Baukau.
“Kona-ba veteranus sira ne’ebé
dezmoblizadu, liu-liu ba 2021 ne’e, Ministériu mós tau ona orsamentu ba 2021,
se orsamentu PN aprova ka liu, atu halo uma 60 ba veteranus sira tinan 24
ne’ebé laiha korrupsaun, tanba veteranu sira barak liu mak husi Lospalos,
Vikeke, Baukau, hanesan ne’e hodi mai no sira barak mak agora uma laiha, rai
laiha, balun ba koa tua, ba hein karau, situasaun ida ne’e mak ha’u agora
daudauk sira hasoru,” dehan Riak Leman ba jornál INDEPEDENTE, via telefone,
Kuarta (19/08).
Nia hatete, uma ba veteranu sira
la’os halo de’it ba ema na’in 60, maibé halo mós ba veteranu sira seluk.
“Primeiru halo uluk ba sira 60
ne’ebé rai laiha, uma laiha, depois tuir fali mak haree tan sira seluk ne’e,
kona-ba veteranu sira-nia situasaun ne’e mak ami aprejenta ona ba iha ne’ebá,”
dehan nia.
Iha fatin ketak, Prezidente
Repúblika Francisco Guterres Lú Olo husu ba governu atu harii uma ba veteranu
sira.
“Seidauk iha duni (uma ba
veteranu), tenke halo, ne’e ha’u hatete de’it hanesan ne’e, seidauk iha duni,
ita tenke fó dignidade ba veteranus sira, liu husi polítika ida kona-ba atu
oinsá mak hodi bele harii uma ba veteranu sira atu bele garante, pelumenus
sira-nia restu vida ne’ebé sira sei iha,” dehan Lú Olo.
Cristina Ximenes | Independente
Sem comentários:
Enviar um comentário