Povu Seidauk Moris Di’ak

TIBAR, (ANTIL) – Prezidente Repúblika, Taur Matan Ruak bainhira  diálogu ho komunidade sira iha Suku Tibar, Postu Administrativu Bazartete, Munisípiu Liquiça, Segunda (17/10) konsidera, Timor ukun-án ona maibé povu seidauk hetan moris di’ak.

Razaun, povu barak seidauk asesu estrada di’ak, saneamentu laiha, seidauk asesu ospitál no mal nutrisaun barak. Taur dezafia veteranu sira atu hamriik luta ba povu nia moris di’ak tanba, kestaun sira iha leten ne’e la’ós governu nia responsabilidade de’it maibé veteranu sira nia responsabilidade nian mós oinsá buka dalan atu rezolve problema ida ne´e.

Maske nune’e, eis gerileiru informa, buat balun ne’ebé estadu ida ne’e halo ona, ne’ebé nasaun sira seluk seidauk konsege halo maka hametin estabilidade no páz.

“Durante tinan 14 ita restaura ita nia independénsia, ita hurlele malu dala rua maka hanesan krize 2006 no kazu Maun Moruk iha 2015. Ema liur dehan Timor mate ona. Maibé, ho espíritu fiar malu, ita konsege rezolve kazu rua ne’e ho di’ak no karik ida ne’e maka kazu última,” Taur esklarese.

Nia hatutan, serteja nasaun ida foun ukun-án, sei falta buat barak. Nia fó ezemplu, Indonézia ukun-án tinan 70 resin no Portugal ukun-án tinan rihun resin ona maibé buat barak sei falta.

“Apezar buat barak sei falta maibé iha tinan 14 nia laran ita konsege dada eletrisidade ba suku sira iha Timor laran. Ne’e ita hotu tenke orgullu. Buat balun ne’ebé seidauk rezolve, ita sei rezolve etapa pur etapa iha futuru,” Taur esplika.  (jornalista: Xisto Freitas; editora: Rita Almeida)

Foto: Prezidente Repúblika diálogu ho komunidade Suku Tibar nu´udar jestu lori estadu hakbesik ba povu. Foto ANTIL/Xisto Freitas