Prezidente timoroan, José Ramos-Horta, husu ohin, iha Universidade Nasionál Timor-Leste (UNTL), atu kria kursu universitáriu sira ne’ebé hatán ba nesesidade estratéjiku dezenvolvimentu nasaun nian.
"Ha'u aproveita hodi halo apelu ida ba dirijente sira hotu, profesór sira no alunu sira ne'ebé prezente iha ne'e: investe iha kursu sira ne'ebé diriji ba nesesidade estratéjiku sira ita nia nasaun nian", hatete hosi xefe Estadu timoroan.
José Ramos-Horta ko'alia iha semináriu ida kona-ba "Papél Universitáriu iha Dezenvolvimentu Nasionál Timor-Leste nian" hodi marka aniversáriu kriasaun UNTL ba dala 24, ne'ebé akontese iha Hera, besik kilómetru 12 hosi leste Díli nian, iha Fakuldade Enjeñaria, Siénsia no Teknolojia.
"Iha ne'e maka ita bele enkoraja ita nia joven sira hodi fó prioridade ba kursu tékniku no sientífiku sira, liuliu iha área sira agrikultura nian, peska nian no floresta nian", nia aponta.
Prémiu Nobel Dame nian destaka mós nesesidade atu kria kursu sira ne'ebé promove dezenvolvimentu industriál no "era dijitál", maka hanesan teknolojia informasaun nian, komunikasaun no finansa.
"Aleinde ne'e, kursu sira ne'ebé diriji ba dezenvolvimentu ambientál sustentável hanesan esensiál atu nune'e ita bele aproveita oportunidade sira hosi ekonomia verde no azul no hasoru problema ne'ebé aumenta hosi asesu ba bee-hemu no tranzisaun enerjétiku ba fonte renovável sira", nia afirma.
Ba José Ramos-Horta, to'o ona tempu atu universidade sira aliña aan ho "nesesidade sira nasaun nian, hodi nune'e komunidade akadémika kontribui ho ativu ba kreximentu no fortalesimentu" Timor-Leste nian.
Iha semináriu, Prezidente timoroan destaka mós dezafiu sira ne'ebé persisti iha nasaun, maka hanesan taxa aas pobreza nian, taxa aas malnutrisaun inan no infantil nian, nune'e mós problema kresimentu nian, ne'ebé afeta labarik rihun resin.
"Dezafiu sira ne'e kontinua fó impaktu ba kuaze metade hosi ita nia populasaun, ne'ebé presiza esforsu ida ne'ebé konstante no alvu hodi hadi'a kondisaun sira moris nian no promove dezenvolvimentu ekuitativu liu", nia hatete.
José Ramos-Horta ko'alia mós kona-ba "abandona eskolár" no barreira sira ne'ebé maka feto sira hasoru nafatin hodi asesu ba edukasaun no partisipasaun ekonómiku.
"Limitasaun sira hanesan ne'e reprezenta obstákulu sira ba dezenvolvimentu inkluzivu no kompromete potensiál ba kreximentu no autonomia hosi sosiedade tomak", hatete hosi responsável, hodi hatutan katak hanesan esensiál investe iha ensinu tékniku-profesionál, formasaun profisionál no ensinu superiór politékniku.
Estudante liu 40,000 oras ne’e eskola iha instituisaun ensinu superior 18 iha Timor-Leste.
RTP | Lusa | Reuters Image
.png)
