Makete ba espansaun Escola Portuguesa de Díli nian aprezenta ba publiku

Makete projetu espansaun Escola Portuguesa de Díli (EPD) nian, ne'ebé maka prevé sala foun 25 no pavillaun multiuzu ida, aprezenta iha semana ne'e iha unidade eskolar nian, no obra sira sei hahú iha tinan 2019.

Prosesu espansaun ne'ebé maka ho kustu total besik dolares millaun 5, sei permiti aumenta kapasidade akollimentu ba alunu sira, hatete diretor eskola nian, Acácio Brito, ba Lusa.

Konstrusaun ne'e sei aumenta tan pizu ida iha edifisiu prinsipal, konstrusaun ba sala multiuzu ne'ebé maka sei sai hanesan auditoriu no jináziu no mós instalasaun rua ba kampu desportivu sira, no mós alterasaun no melloria sira seluk.

Tinan ne'e EPD iha alunu sira hamutuk na'in 1.032, ho na'in 270 iha ensinu pré-eskolar, na'in 376 iha 1º siklu, na'in 131 iha 2º siklu no na'in 121 iha ensinu sekundariu.

Intervén iha aprezentasaun ba makete ne'e, embaixador Portugal nian iha Dili, José Pedro Machado Vieira, rekorda lista espera barak ne'ebé maka EPD iha ona agora daudaun ne'e.

Nia hatete, obra sira ne'e hanesan "pasu ida tan ba prosesu hodi hadiak kondisaun sira hodi permiti Eskola ne'e fó edukasaun ida ho kualidade no mantein hanesan referénsia, iha oferta edukativa iha Timor-Leste".

"Projetu ampliasaun ba instalasaun eskola nian ne'e esensial ba kumprimentu ba objetivu instituisaun ne'e nian, ba iha garantia kualidade ensinu, melloria rezultadu alunu sira nian, ba alargamentu ba numeru admisaun nian, hodi inklui mós sira ne'ebé maka tinan-tinan kandidata maibé la konsegue tama, tanba kapasidade fizika hodi intrega iha eskola ne'e", refere.

"Alargamentu ne'e permiti, halo luan tan oferta formativa ba dosente sira, liu hosi Sentru Formasaun, ne'ebé too momentu ne'e okupa de'it ba formasaun ba dosente sira EPRC nian, no pretende tau ba serbisu formasaun ba profesor sira iha funsaun iha sistema edukativu timoroan nian", refere tan.

EPD integra iha programa kooperasaun bilateral entre Portugal no Timor-Leste iha tinan 2017, no tuir valor sira Ajuda Publika ba Dezenvolvimentu (APD) ultrapasa euro millaun 13.

Kooperasaun portugueza mós halo parte, mós programa sira seluk, projetu Sentru Aprendijazen no Formasaun Eskolar (CAFE), ne'ebé maka abranje edukasaun pré-eskolar no ensinu baziku iha munisipiu 13 no ano letivu oinmai sei loke tan ensinu sekundariu.

Halo mós parte projetu Formar Mais, ba formasaun kontínua ba profesores sira no apoiu ba jestau eskolar, projetu Kapasitasaun Universidade Nasional Timor-Leste nian (UNTL) iha Lian Portugueza no Formasaun, ba jornalista sira no Forsas de Defeza sira.

Iha ámbitu kooperasaun portugueza nian iha área edukativa, tinan-tinan atribui bolsas de estudu iha ensinu publiku iha Portugal ba grau lisensiatura, mestradu no doutoramentu no bolsa de estudu interna ba ensinu superior iha Timor-Leste.

SAPO TL ho Lusa