Oinsa Implikasaun FM ba Regime Kontratu Kampu Minarai Bayu Undan no Greater Sunrise

Husi: Teodoro M. Mota | opiniaun

Regime kontratu iha kampu minarai Bayu Undan (BU) no Greater Sunrise (GS) kontinua deit nia regime uluk iha tempu Indonesia no Australia, wainhira 2002 Timor Leste (TL) restaura independensia. TL mak nain ba rekursu substitui Indonesia. Nunee kontratu sira uluk konverte husi Timor Gap mai iha JPDA (joint petroleum development area), depois de tratadu tasi timor 2002 asina. Kampu BU hahu deskoberta iha tinan 1995 ho rezervatoriu gas no kondensadu. Estimasaun 550 MMbbls milioens barrels hidrokarbunetu liquidu no gas 4 tcf (trillion cubic feet). Kampu BU lokalija iha tasi timor area de dezenvolvimentu petrolifero konjunta ou joint petroleum development area/JPDA.

Kampu BU hahu produs liquidu iha 2004 no gas hahu produs 2006. Tuir informasaun husi ConocoPhillips nudar kompanya operador iha BU katak estimasaun kampu BU nia life time to'o tinan 2022 sei la ekonomis (kustu operasaun boot liu kustu rekoperasaun). Kampu BU kontribui ona receitas ba kofre estadu purvolta $ 30 billioens dollares amerikanu. Husi receitas $ 30 bilioens, $ 15 bilioens mak uja ona ba despeza publiku depois de independensia 2002 ate to'o agora no futuru. Nunee fundu petroleum (FP) agora dadaun rai iha banku federal US purvolta $ 16,98 billioens dollar amerikanu. Receitas husi kampu BU 99,9% mak finansia OJE kada anum ba seitor dezenvolvimentu hotu-hotu iha TL.

Enkuantu produsaun gas husi kampu BU prosesa iha darwin LNG ou norte Australia. Tuir akordu tratadu anterior, Australia benefisiariu husi dezenvolvimentu kampu BU. Australia unilateralmente reklama kontrolu ba kadoras BU tomak inkluindu impostu. Australia mos unilateralmente apoia ka faan gas helium. Gas ida nebee importante tebes ba iha area defeja ninian no prosesa iha darwin LNG. Maibe faan gas helium la hetan konhesementu ou nunka atu fahe ho receitas ba TL. Nunee mos Australia benefisia husi lei karantina. Signifika equipamentus nebee tama no fornese ba kampu BU nee tenke liu husi ou sujeita ba Australia, inklui 90% fornese bems de servisu ba operasaun BU mai deit husi Australia.

Regime kontratu kampu BU tuir kontratu nebee iha agora dadaun. Rendimentu fahe ba parte rua:

1. Royalty katak depois faan mina no gas, osan fahe kedan molok deduksaun ba kustus. Nemak hanaran royalty ou first tranche petroleum (FTP). Royalty 10%, husi 10% sei fahe tutan ba governu TL no Australia ho percentajem 90%:10%. 90% mai TL no 10% ba Australia tuir akordu tasi timor.

2. Lukru. Lukru iha BU mai husi produtu rua mak liquidu no gas. Liquidu fahe 50%:50%, katak 50% ba governu no 50% seluk ba kontraktor. Governu 50% sei fahe tutan ba governu TL no Australia ho percentajem 90%:10%. Enkuantu lukru husi faan Gas fahe 60%:40%. Tuir tratadu tasi timor 40% ba governu TL no Australia. Husi 40% fahe tutan 90% ba TL no 10% ba Australia. Enkuantu 60% ba kontraktores sira. Receitas husi kampu BU mai husi lukru, royalty, no impostu.

Rejime kontratu kampu GS depois de fronteira maritima (FM) asina iha 06 marsu 2018. Saida mak greater sunrise (GS)?. GS mak kampu minarai nebee lokalija iha tasi Timor no klaim husi governu TL ho Australia. GS identifika iha tinan 1974. Kampu GS kompostu husi kampu gas rua mak; Sunrise no Troubadour ho potensia rezervatoriu gas purvolta 7.7 tcf (trillion cubic feet), no mina purvolta 300 millioens barrels kondensadu. Hare ba dadus hatudu rezerva gas iha kampu GS boot liu gas kampu BU. Komersialidade kampu GS depende ba rezerva mina no gas, presu, no demanda gas iha merkadu. Investimentu kustu ba projeitu; explorasaun, perfurasaun, produsaun, fatin prosesamentu produtu ate to'o marketing (kustu downstream no upstream) purvolta $ 10.5 to'o $ 12 billioens dollars.Tuir informasaun husi Timor Gas ep., Eng. Francisco Monteiro, potensia mina TL emjeral inklui kampu greater sunrise ho potensia mina equivalente 6,3 billioens barel petroleum nebee bele produs to’o 50 anos ho valor osan $ 378 billioens dollars. Potensia nee bele reprezenta fundu explorasaun nebee sei konsume $ 223 billioens dollars ba nesesidades sira hanesan kestaun teknika, dezenvolvimentu, manutensaun, operasaun no benefisiu fiskal no rendimentu publiku liu $ 47 billioens dollars (Fontes informasaun; Timor Gap ep., Eng. Francisco Monteiro deklarasaun iha noticias sapo.tl, edisaun 18 abril 2019, horas 19:12).

Efektividade fronteira maritima (FM) wainhira ratifika ona husi parlamentu Australia no TL signifika kampu minarai Kitan, BU 100% tama iha area TL. Implikasaun FM hamosu regime espesial foun iha kampu GS, maibe fo vantajem boot ba TL. Iha kontratu laran karik pipeline gas mai TL sei fahe rendimentu 70% mai TL no 30% ba Australia. Redimentu husi royalty 10% (5% ba governu no 5% ba kontraktores). Husi 5% ba governu sei fahe tutan ba governu TL no Australia ho percentajem 70%:30% signifika 70% mai governu TL no 30% ba governu Australia tuir akordu regime spesial foun iha kampu GS. Enkuantu 5% seluk ba kontraktores.

Rendimentu seluk ba TL sei mai husi investimentu kustu kapital. Kustu kapital mak tuir kontratu refere hare liu ba kustu peskijas hotu nebee hahu husi explorasaun geolojia, seismiku, ou buka minarai no gas husi inisiu to'o hetan petroleum ou deskobre mina no gas. Kustu kapital tuir maneira kontratu nebee iha kuandu wainhira kompanya investa osan ona hodi buka mina no gas, estadu tenke selu 100% hafoin aumenta tan 127% hanesan kreditu investimentu (investment credit ou IC). Nee maneira kontratu uja hodi atrai ekonomikamente ba kontraktores sira hodi investa iha ita nia rai. Ho partisipasaun 56.56% TL nia iha dezenvolvimentu kampu GS. Signifika TL mos sei benefisia husi instrumentu IC 100 + 127%.

Regime kontratu iha kampu GS depois de FM. Rendimentu upstream, pipeline gas mai TL. Rejultadu sei fahe 70% ba TL no 30% ba Australia. Downstream exceptu karik international oil company (IOC) ruma hakarak investa entaun konserteja 100% mai TL. Fahe lukru iha kampu GS tuir kontratu sei fahe 50% ba governu (husi 50% nee sei fahe 70% ba TL no 30% ba Australia) no 50% seluk ba kontraktores. Kontratu fahe rezultadu sei aplika mos ba produsaun produtu liquidu no gas iha kampu GS. Nemak realidade no lalaok regime kontratu iha kampu GS depois de FM asina. Ho partisipasaun TL iha kampu GS sei hetan benefisiu dobru liu tan ba receitas TL. Rendimentu ba TL iha GS sei mai husi royalty, lukru, impostu, no reimbolsa ba kustu kapital.

Implikasaun FM depois asina iha dia 06 marsu 2018 fo benefisiu boot ba TL, tamba kampu minarai bayu undan, kampu minarai kitan, kampu bufalo, no kampu laminaria carolina 100% tama hotu mai iha area TL no timor mak nain ba rekursu, nunee receitas husi kampu hirak nee 100% tama hotu ba kofre estadu.

Molok asina FM kampu bufalo ho laminaria pertense ba Australia. Depois de realijasaun FM tuir kontratu sei posibilija empregador ou fornesementu bems de servisu iha kampu BU, GS, bufalo, laminaria carolina sei mai husi timor oan, tantu konaba lei karantina, supply equipamentus, apoiu lojestiku bele mai husi TL. Signifika ho realijasaun FM, kontratu anterior balu sei autentikamente la fungsiona, no sei konverta kontratu hirak nee tuir akordu foun nebee governu TL ho Australia konkorda ona, nunee mos nafatin garantia kondisoens equivalente para la bele prejudika kompanya operador no joint venture. Ikus mai TL mak maioria sei benefisia entermu de fahe rezultadu ou rendimentu, royalty, impostu, reimbolsa kustu kapital 100 + 127%, fornesementu bems de servisu 90% sei mai husi TL ou sujeita liu husi TL, fornesementu equipamentus no apoiu lojistika, karantina sei liu husi TL, nunee ikus mai sei estimula ita nia ekonomia no garantia sirkulasaun osan iha rai laran, kria kampu servisu, transfer skills no teknolojia ba jovem no foin sae, hamosu enterpreneurship, hamosu kompetividade, hamoris seitor edukasaun, saude, agrikultura, peskas, turismu, hotelaria no ect ikus mai sei fo independente ekonomia ba TL wainhira pipeline gas mai TL. God bless TL.

Referensia

[1] http://noticias.sapo.tl/portugues/info/artigo/1531899.html

[2] Internet web:http://web.anpm.tl/

[3] TVTL, GMNTV no Radio (8 Dezembru 2018): “Semináriu nasional kona-ba asuntus relasionadus ho fronteiras marítimas no nia impaktu ba atividades petrolíferas”, Sentru Konvensaun Dili (CCD).

[4] TVTL, GMNTV no Radio (8 Janeiru 2019): “Aprezentasaun husi Chefi negosiador, ANPM, Timor Gap ep., kona-ba asuntus relasionadus ho fronteiras marítimas no sosa asoens conocophillips no shell energy”, Parlamentu Nasional (PN).

[5] Internet web:https://www.facebook.com/TimorSeaBoundary/

[6] Atlantic LNG (2007). Web: http://www.atlanticlng.com/

[7] Internet web:https://www.timorgap.com/databases/website.nsf/vwall/home

[8] internet web; http://gmntv.tl/en/economia/2019/05/explorasaun-kampu-gs-sei-fo-servisu-ba-timor-oan-10-000/?fbclid=IwAR0gzQUKbZh6zxMHkabdjdZiQSVp5SFc2SKkhTn8HsxbtPrtYSnfKhQZX2g

[9] internet web; http://www.tatoli.tl/2019/05/31-marsu-2019-fundu-pertoleu-sae-ba-biliaun-us1698/