KAFE TIMOR HETAN PRIVILÉGIO

Jornal Nacional, editorial

Povu Timor Leste senti kontenti wainhira rona ninia produtu lokal kafe Timor hetan privilégio iha expo Internasional Milan – Italia iha tinan 2015 nee. Durante Timor –Leste naran boot iha mundo ho produtu kafe, aleinde produtu Aikameli, no rikusoin natural sira seluk, oil no gas.

Kafe Timor Leste ninia nee sai naran boot no ema hotu gosta hemu tamba kafe nebe sei organiku, ninia morin natural, kosumo senti gostu kompara ho kafe sira husi nasaun seluk nian nebe uza ona fertilizante anorganika.

Nudar nasaun foun ita senti proud ka orgulho tamba iha produtu nebe bele Fera merkadu internasional no hetan apresiasaun mundo tomak nian ba ita nia produtu nee.

Laos deit expo internasional Milan- Italia, antes nee mos Timor Leste tuir ona expo iha China no mos iha nasaun seluk, nunee mos Grupo feto Japaun promove produtus lokal Timor Leste nian hanesan Kafe no tais iha festival Takato Park ho produtu ‘icon’ timor nian.

Ho apresiasaun nasaun sira nebe partisipa iha Expo nee, sa tan estand hotu-hotu iha expo nee sei konsumu deit kafe Timor alemde kafe sira husi Brazil no Amerika latina sira seluk, nee orgulho boot ida ba timor.

Agora pergunta mak oinsa ita bele dezenvolve ita nia produtu nee? Tantu oinsa atu subervive kafe iha timor no mos oinsa ita bele organiza didiak atu bele kompete ho kafe sira husi nasaun seluk nian.

Maske produtu Kafe Timor nee kualidade maibe sei lakon kompetisaun iha merkado tamba kafe produtu nasaun seluk nian nee laiha kualidade maibe jestaun diak, organiza didiak, tau pakote ida nebe diak, prezu baratu no simplis.

Laiha duvida, ohin loron nee kompanhia NCBA, kompanhia amerikanu nian ida mak halo exportasaun kafe Timor nee ho volume bo’ot maibe kompanhia nee sosa kafe husi agrikultur sira ho folin nebe baratu halo, povu agrikultor kafe senti dezanima ba folin sira nee hodi sira lakon esperansa atu aguenta vida agrikultor kafe nian.

Agora asaun konkretu saida mak governu atu halo hodi follow up konfiansa Konsumidor sira. Los duni expo nee parte ida maibe negociu mos tenki lao atu nunee naran kafe Timor nee kontinua lao. Itan Hein