TL LA’O TUIR DAUDUN DAKAN INKLUSAUN FINANSEIRA

DILI - Timor-Leste dadaun ne’e sai uma nain ba enkontru Banku Central Regional Illa Pasifiku nian hodi promove sistema inkluzaun finanseira. Sistema ne’e oinsa atu fasilita ema iha asesu ba servisu finanseira baziku hanesan poupa no kreditu, hodi aumenta liutan asesu populasaun hotu iha rejiaun pasifiku ne’e iha servisu bankaria no kreditu. Enkontru ne’ebe hala’o durante loron rua (2) iha hotel Novo Turismo, Lesidere, Dili, kinta feira (07/05), ho tema oinsa asesu ba servisu finanseiru no oinsa atu fasilita dijitaliza servisu finanseira, edukasaun ba finanseira inklui protesaun ba konsumidor sira.

Primeiru Ministru Rui Maria de Araujo rasik halao lansamentu ofisial ba Inisiativa Rejional Illa Pasifiku (PIRI) halo aliansa hamutuk ho naran Alliance for Finance Inclusion (AFI). Pacific Island Regional Initiative (PIRI) ho banku Central Timor Leste (BCTL) hamutuk promove inklusaun finanseiru hodi hakbesik sidadaun ba finanseiru baziku. Governador Banku Central Timor Leste (BCTL), Abrao de Vasconselhos  informa, enkontru ida ne’e koalia kona ba oinsa atu promove inkluzaun finanseira.

Enkontru ne’ebe hala’o durante loron rua(2) ho tema oinsa asesu ba servisu finanseiru no oinsa atu fasilita dijitaliza servisu finanseira, edukasaun ba finanseira inklui protesaun ba konsumidor sira. Partisipa iha enkontru ne’e Governador Banku Central Solomon Islands Denton Rarawa, Atalina Ainuu-Enari Governadora Banku Central Samoa, Governador  Banku Central Tonga nian Sione Kioa, Vereimi Levula Chief Manager Reserve Bank of Fiji, Peter Tari, Vice Governador Banku Central Vanuatu, Abrao de Vasconselhos Governador Banku Central Timor-Leste, Norbert Mumba, Deputy Executif Direktor, Alliance For Financial Inclusion, Brigidu de Sousa, Chairman of the Board of BancoNasional de Comercio Timor Leste(BNCTL), Miguel Malheiro Reymao Deputy Director of Caiixa Geral de Deposito TL, Prof. Ross Buckey, University of New Shout Wales Australia.

Governador BCTL Abrão de Vasconselhos hatete enkontru refere nudar ba dala 14. Ba tinan ida  ne’e Timor-Leste mak sai uma nain ba iha inagurasaun ba inisiativa banku sentral iha ilha pasifiku nian. Husi enkontru refere hafoin tranforma ba inisiativa regional ida iha ilha pasifiku ba marka prezensa iha enkontru refere banku central hitu iha ilha pacifiku mak hola parte iha inisiativa regional ida ne’e bazikamente atu fasilita inklusaun finanseiru. Inisiativa husi banku central hitu ne’e mak hanesan Timor Leste, Fiji, Tonga, Samoa, Salomon, Vanuatu. Forum ida ne’e hanesan plataforma ida ne’ebe banku central sira tur hamutuk fahe esperensia kada husi banku central ida-idak hodi bele fasilita ba iha servisu finanseiru baziku, poupansa, asesu ba iha kreditu ba iha nia povu sira. 

“Iha transfomasaun husi grupu trablhu ida ne’ebe agora transforma ba, ne’ebe iha banku central 7 mak hola parte iha inisiativa ida ne’e, ne’ebe bazikamente oinsa atu promove inkluzaun finanseira,” Abrao informa ba jornalista sira iha Hotel Novo Turismo Lesidere, kinta-Feira (7/05) Nia afirma forum ida ne’e hanesan plataforma ida ne’ebe banku central sira tur hamutuk hodi fahe esperensia kada nasaun ida-idak nian depois ida ne’ebe diak foin implementa no adapta tuir sirkustansia no situasaun rai ida-idak nian.

Ho ida nee BCTL sei apdeit (up-date) mak intrudusaun kuadru legal ba regula ajensia bankaria, lansamentu R-Timor  no edukasaun finanseiru. AFI kompostu husi Banku Central nasaun sira Illa Pasifiku mak hanesan Timor- Leste, Fiji, Tonga, Samoa, Salomon, no Vanuatu. Institusaun finanseira hanesan Banku Central AFI nian, servisu bankaria  uza ona sistema inkluzaun finanseira iha mundu globalizasaun inklui Timor-Leste mos. Lansamentu ida ne’e hodi aumenta populasaun nia asesu ba iha servisu bankari nian.

Primeiru Ministru Rui Maria de Araujo ba jornalista sira hafoin lansamentu hatete mundu ne’e transaksaun ba ema uza osan ne’e instituisaun ne’ebe sai fasilitador mak banku sira, entaun banku sira iha Rejiaun Pasifiku nian ne’e halibur hamutuk iha ne’e hare oinsa atu lori tan servisu bankaria ba populasaun barak liu tan. Tuir nia, oras ne’e daudaun iha munisipiu sira komesa ona halao servisu bankaria maibe iha nivel postu administrative, suku inklui aldeia sira populasaun seidauk asesu ba servisu bankaria.

Xefe governu  dehan Banku Central Timor Leste nia partisipasaun iha inisiativa regional ne’e hodi hare oinsa atu bele aumenta tan kapasidade ida ne’e iha Timor Leste. Nia fo ezemplu  ema barak halao viajen ba rai liur la lori osan maibe  lori deit kartaun kreditu hodi selu pasajen viagen nian liu husi meus elektroniku. “Ita Timor Leste seidauk to’o iha ne’eba maibe loron ida sei ba to’o iha ne’eba tanba ita hotu hatene katak tau osan iha bolsu iha risku boot, ema ruma asalta ita iha dalan klaran ka ema ruma hakarak hadau osan husi ita nia osan cash entau ba hotu ona,” afirma Rui.

Rui dehan kuandu TL asesu ona ba iha finanseiru ho modernu liu husi teknolojia no sistema finanseiru inkluzaun ne’e sei fasilita diak liu tan transasaun no servisu hirak ne’e TL atinji laos deit ba iha nivel governu maibe mos sei fasilita setor privadu sira. “Ezemplu boot ba iha emprezariu sira manan projetu iha Timor no selu sira nia supplyer ka ema ne’ebe fornese sasan ba sira la presiza ona cash ho mala boot ba selu,” nia hatete, Xefe governu rekoñese banku central mesak labele halo servisu hotu-hotu maibe tenke servisu hamutuk ho banku komersial sira iha TL. Banku Central mak nudar regulador ba iha banku sira seluk tanba banku sentral hanesan banku estadu nia hodi servisu tuir lei hodi regula sistema finanseiru iha TL. (BT)

Business Timor - Pedro