ANIVERSARIU FALINTIL BA DALA 40, F-FDTL ENTREGA KNA’AR BA JERASAUN FOUN

Estado Timor-Leste (TL) sei selebra aniversario Forsas Armadas Libertasaun Nasional Timor-Leste (FALINTIL) ba dala hat nulu iha loron 20 Agosto 2015, iha momentu ne’e mos Estado TL halo reforma ba eis FALINTIL no mos ofisiais FALINTIL-Forsa Defeza Timor-Leste (F-FDTL) balun no entrega hikas kna’a ba jerasaun foun atu lidera instituisaun F-FDTL.

Xefi Estado Maior General das F-FDTL, Maijor Jeneral, Lere Anan Timur, hateten katak, Estado iha poder tomak atu fo rekonhesementu ba eis FALINTIL no Militar sira ne’ebe mak sei ativo, tanba sira idade ona atu ba reforma.

“Depois ita hare Forsas Armadas durante tinan sanulu resin iha 20 Agosto 2015 halo tinan ba dala 40, iha loron ne’e duni ita nia Governu no Estado rekonhese sira ne’ebe mak servi instituisaun Estado nian desde iha tinan 1975 to’o mai agora. Sira ne’ebe mak FALINTL no sira ne’ebe mak eftivo iha F-FDTL halo tina sanulu resin. Sira atinji ona tinan ba reforma hanesan tinan hitu nulu ba leten, ne’ebe sei entrega ba jerasaun foun,” dehan Maijor General, Lere Anan Timur ba Jornalista sira iha Componente Centru Formasaun e Treino, Nicolau Lobato, Metinaro, Tersa (23/06/2015).

“Ami sira ne’ebe mak komanda imi dadauk ami besik atu husik imi ona, husik la signifika katak asu soe imi, mais ami sei tau matan nafatin bainhira ami la kaer imi, ami sei entrega ba Jerasaun foun atu komanda imi,” dehan Lere.

Iha loron 20 Agosto FALINTIL selebra tinan hamutuk hat nulu ne’ebe Forsa Armadas ne’ebe mak durante ne’e serbi Estado liu husi Instituisaun F-FDTL balun atinji ona tinan hat nulu iha F-FDTL, ne’ebe iha loron ne’e sira husik hela ona instituisaun hodi fila ba moris hamutuk ho sosiedade no hala’o vida civil.

Tanba ne’e maka Maijen Lere husu ba jerasaun foun sira atu rona malu kumpri ordem disiplina no responsabilidade, ida ne’e mak inportante liu bainhira hala’o knar. mia

Jornal Nacional