VIZITA LORON SORIN TURISTA MAI TL KONSEGE HATAMA OSAN $53.160

DILI - Sabadu, 13/06,  semana kotuk Timor-Leste pasa ho ezitu teste boot ida iha setor turizmu  tanba Timor Leste  simu turista  rihun rua hitunulu resin ida (2071) ho kruzeiru australianu Pacific Jewel ne’ebé ba dala uluk realiza tour iha zona Timor-Leste. Maske kondisaun Portu Dili  klot atu simu turista sira inklui kondisaun infranstrutura seidauk kria kondisaun diak atu  ema  bele halo visita Timor-Leste, maibe Governu Timor-Leste liu husi Ministru Turismu servisu hamutuk ho ONG balu  organiza vizita refere konsege kria rendimentu boot ba iha transporte publiku sira liu-liu hanesan kareta aluga, taxi tanba kada kareta ida nia folin to’o dollar atus haat ($400) hodi halo tour ka atividade hodi visita fatin sira ne’ebé importante iha Timor-Leste.

Tuir observasaun jornalista nia durante oras 10 nia laran hahu husi tuku 7 to’o tuku lima lokraik turista sira konsege halo tour hodi la’o visita fatin potensial sira hanesan munisipiu Ermera hodi haree setor kafé nian, no Likisá no Maubara hodi koñese edifísiu kolonial iha zona refere. Maski vizita Australian Pacific Jewel  tama iha Timor-Leste nudar etapa dahuluk ba iha Timor Leste konsege lao haleu Dili laran mak hanesan Kristu Rei, Hera, Santa Crus, Tasi Tolu, Museu Dili, Hotel Timor iklui fatin sira seluk ne’ebé potensial iha Dili laran.

Tuir Ministru Turismu Fransisco Kalbuadi, katak Estadu TL hetan osan ho total $53.160 liu husi turista hamutuk rihun rua resin ne’ebé mai husi nasaun 15 ne’e. Tuir ministru turismu katak sei kontinua tenta nafatin atu kada fulan tolu turista sira  mai bebeik iha TL  nudar objetivu diak ida ba iha TL tanba ida ne’e foin primeira ves Timor-Leste simu turista rihun rua iha loron ida. “Ita sei halo planu kada fulan tolu dala ida,” dehan Ministru Turismu Kalbuadi ba jornalista sira iha sabadu semana liu ba. Tuir informasaun ne’ebé jornalista hetan katak turista sira ne’ebé tama iha Timor-Leste fahe ba iha oin rua. Ida ho independente ne’ebé la’os responsabilidade komisaun organizadora nian. Ida fali nudar responsabilidade komisaun tanba hetan lista husi kru sira ne’ebé mak halo viajen ho transporte ne’ebé prepara ona husi komisaun.

Iha Portu Díli, iha ne’ebé pasajeiru sira to’o taxi no mikrolet sira oferese negósiu ba turista sira ho destinu marka ona ka hakarak pasiar oras rua iha sidade. Tuir infromasaun ne’ebé hetan katak Sydney Pacific Jewell sai hosi Singapura iha loron 5 Juñu ne’ebé sai hanesan alvu reparasaun no manutensaun - no atualmente iha viajen ne’ebé inklui parajen iha Indonézia (Semarang, Bali no Illa Komodo), Timor-Leste no Papua Nova Guine. Ró, ne’ebé iha tripulasaun ema 730, no kuartu kuaze 840, karik sei to’o iha Brisbane, iha estadu Australianu, Queensland, iha loron 21 Juñu.

Dezeñu husi italianu Renzo Piano no kapasidade ba pasajeiru 2.000 resin - hafoin reforma ne’ebé halo iha tinan hirak ikus ne’e -, ró ho tonelada rihun 70, konves 11 no komprimentu ho metru 245. Iha loron Sabado lori souvenirs hosi Timor-Leste, ne’ebé sosa husi turista barak ne’ebé almosu iha Areia Branca (Raihenek Mutin), tasi-ibun ne’ebé famozu liu iha Díli, fatin ne’ebé instala merkadu pontuál hodi fa’an produtu lokál. (BT)

Business Timor - Pedro