L-7 Husu Estadu Re-estrutura F-FDTL, Paixão: Ema Hotu Tenke Hakruk Ba Lei

Vise Xefe Estadu Maior F-FDTL, Brigadeiru Filomeno Paixão, hatete katak, nia respeita Cornelio Gama ‘L-7’ nia lia fuan ne’ebé husu ba Estadu atu re-estrutura Falintil Forsa Defeza Timor Leste (F-FDTL) no Polisia Nasional Timor Leste (PNTL). Maibé Filomeno Paixão mós husu L-7 atu apar ho situasaun agora, tanba forsa militar agora la’o iha lei nia okos, entaun ema hotu tenki hakruk ba lei.

“L-7 koalia lai, ha’u la hola ba lia, ema idade ona, no veteranu ida, ha’u mós respeita nia,”dehan Filomeno Paixão ba jornalista sira iha Palasiu Governu, Tersa (23/6).

Filomeno Paixão dehan, nia simu lia fuan ne’ebé mak L-7 koalia ba nia ne’e, tanba nia (Paixão) agora iha militar ida ne’ebé ho sistema foun.

“Katak, forsa agora ne’e, forsa ida ke kaer ba lei ne’ebé hakerek iha suratahan. Ne’ebé hau nia pozisaun mak nune’e nafatin, purtantu se veteranu ka, Prezidente da Repúblika rasik, ka Prezidente Parlamentu ka, Primeiru Ministru ou Ministru sira ka, Jeneral Lere ka, ba hau rasik, tenke hakruk ba lei ka,”relata Filomeno Paixão.

Nia haktuir, Lei mak tenke manda ema hotu, la’os dehan ema ida la konsidera fali Veteranus sira.

“Ida ne’e ita matan delek ka, ita bulak hotu ona. Ha’u mós la’os hola buat ne’ebé maun L-7 hanoin rasik, no hau mós iha hau nia hanoin,”afirma Filomeno Paixão.

Antes ne’e, Cornelio Gama ‘L-7’, husu ba Estadu atu halo re-estruturasaun lalais ba Forsa Defeza Timor Leste (F-FDTL), nomos Polisia Nasional Timor Leste, (PNTL), inklui Ministru Interior Longuinhos Monteiro, no Brigadeiru Jeneral F-FDTL Filomeno Paixão, tanba sira laiha kapasidade atu lidera instituisaun rua ne’e ho diak.

“Ha’u husu ba Governu, Komandante sira ne’ebé la gosta veteranus, ami koñese mós hotu ona, liu-liu Filomeno Paixão koalia buat barak, Pedro Belo, Longuinhos Monteiro, sira ne’e mak estraga nasaun, ami gosta sira tenke hasai hotu tau fali ema foun tanba sira la serve,”dehan L7.

L-7 mós ejiji ba Jeneral Lere atu hasai Filomeno Paixão, tanba kontra FALINTIL, Veteranus hodi dehan, luta tinan 24 ka tinan 30, nia la interese.cos

Jornal Nacional