PN HUSU GOVERNU TAU ATENSAUN PONTE NO IRIGASAUN IRABERE

Membru Parlamentu Nasional (PN) husu ba Governu atu tau atensaun seriu ba Ponte no irigasaun Irabere ne’ebe mak to’o ohin loron sei kontinua abandona.

“Irabere ne’e projetu boot ida que ita tenke-ser rezolve, tanba Irabere ne’e bele aproveita be mota nian ne’e bele rega irigasaun sira hektares barak kuaze mil ital hektares”dehan prezidente komisaun E ne’ebe trata ba asuntu infra-estruturas, transporte e komunikasaun, deputadu Pedro dos Martires da Costa ba JN-Diario Tersa (23/6) horseik iha PN.

Nia hatutan projetu ne’e liu husi Orsamenu Estado, altura ne’eba ne’e inisiativa deit Sekertariu Estado nian mak fo ordem trabalho ba Kompañia sira e Kompañia sira halo la hun la dikin, la tuir dezenho ne’ebe que diak, laiha diskusaun diak, komu laiha orsamental ne’ebe que mai iha orsamentu estado kansela ou paradu tiha.

Antes ne’e mos PN liu husi komisaun E husu ona ba MOP no ema peritus sira atu halo estudu didiak hafoin halo konstruksaun hodi bele garante kualidade obra.

“Altura ami ba iha ne’eba dala rua husu ba MOP ho ema priterus sira ne’ebe que kaer dadauk iha ne’eba ne’e atu halo estuda didiak, halo dezenho, halo BoQ ne’ebe que diak para halo konstruksaun karik, halo konstruksaun ida diak atu lori be ne’e to’o natar sira ne’e,”haktuir deputadu Pedro.

Deputadu CNRT ne’e komenta liu tan katak, Irabere iha obra rua mak, Ponte Irabere no irigasaun, asuntu ne’e rekomenda ona e Governu toma konsiderasaun, maibe tuir regras sei halo levantamentu de dadus, dezenho, BoQ , halo kontartu ne’ebe que diak fo ba impreteriu ne’ebe que iha kapasidade atu halo konstruksaun ne’e tuir regra hodi garante kualidade.

Iha fatin hanesan Prezidente komisaun D ne’ebe trata ba asuntu Ekonomia e Dezenvolvimentu, deputada Jacinta ‘Abu Cau’ Pereira hatutan katak, kestaun Ponte Irabere no irigasaun ne’e problema ne’ebe mak PN levanta bei-beik, maibe to’o ohin loron ladauk rezolve.

“Problema ida ne’e kuandu nafatin la rezolve fo impaktu ba ita nia komunidade, tanba sira labele utiliza sira nia natar ho diak, tanba ne’e Ministeriu relevante hahu ona tau importansia para bele responde ida ne’e,”deputada Jacinta argumenta.

Nia sublinha, Governu persiza fo atensaun seriu ba problema refere para bele hasae produsaun hare.

“Ida ne’e mos atu ajuda ekonomia povu ninian pelumenus ita la hapara 100% mas ita redus oituan importansaun, tanba ita dependenti ba importasaun ne’e makas teb-tebes”hateten deputada Jacinta.

Entretantu iha vizita Prezidente Republiak (PR), Taur Matan Ruak semana ne’e iha fatin refere komunidade Suku Irabin de Baixo, Postu Administrativu Uatocarbau, Munisipiu Viqueque, tatoli ba PR Taur, atu hatutan ba Governu hodi tau atensaun ba mota Irabere, tanba iha tempu udan boot bele lori dezastre bot ba natar hektaree 10 iha area refere.

Suku Irabin sei kaer ba baliza tradisaun nian ne’ebe besik malu ho Suku Uani-Uma, Loe-Ulo, Afaloicai ho Bahatata, Suku Irabin iha aldeia 7. bal

Jornal Nacional