Eis-ministra
timoroan Lúcia Lobato fó sai katak sei avansa ho kesar sira hasoru Estadu
portugés no estuda opsaun sira relasionadu ho Timor-Leste hosi informasaun foun
sira kona-bá nia kondenasaun iha 2012 tanba partisipasaun ekonómiku iha negósiu.
Iha
karta ida ne'ebé haruka ba Prezidente Repúblika timoroan, Taur Matan Ruak, no
ne'ebé maka Lusa hetan asesu, eis-ministra Justisa hatete katak senti "iha
obrigasaun hodi hahú kombate foun ida iha loron-ohin".
"Kombate
ida ba ha'u nia honra no ba indemnizasaun hosi prejuizu morál no materiál sira
ne'ebé sira halo hodi akuza ha'u", nia hatete.
Karta
ne'e haruka hafoin Supremu Tribunál Justisa (STJ) portugés anula kastigu ida
suspensaun ba loron 40 ne'ebé maka Konsellu Superiór Majistratura (CSM) aplika
ba juíza Margarida Veloso, antiga inspetora judisiál ida iha Timor-Leste ne'ebé
fó sai no akuza kolega portugés na'in rua katak manipula no influensia prosesu
judisiál ne'ebé halo kondenasaun ba kastigu kadeia Lúcia Lobato nian.
"Rekorente
(Margarida Veloso) fó sai faktu sira integrante hosi ilegalidade todan no
iregularidade ba prosedimentu sensível sira, iha mínimu, sai hanesan kazu ba
prejuizu todan ba arguida Lúcia Lobato", refere hosi rezolusaun hosi
konselleiru Oliveira Mendes, ne'ebé Lusa iha asesu iha loron-tersa ne'e hodi
refere ba atuasaun hosi Rui Penha no Cid Geraldo, juís na'in rua ne'ebé
kolokadu iha Timor-Leste no sai hanesan denúnsia hosi juíza ne'e.
Margarida
Veloso hetan suspensaun tanba hato'o kesar ba CSM katak juíz sira, ne'ebé
mantén kondenasaun hosi eis-ministra timoroan ne'e, la izentu, haktuir hosi
e-mail ida ne'ebé juís na'in ida kongratula ho desizaun.
"Prosesu-krimi
ne'ebé atinji iha kondenasaun antigu ministra Justisa Timor-Leste nian, Lúcia
Lobato, nakonu ho vísiu, ilegalidade sira no violasaun sira hosi prinsípiu
elementár sira direitu prosesuál penal nian no hosi garantia sira arguidu
nian", refere hosi rezolusaun hosi STJ.
Rezolusaun
refere duni ba "justisa ida ne'ebé hanesan invertidu" no
"hanesan labele akontese iha Estadu ida ne'ebé hakarak Direitu no hosi
Direitu demokrátiku nian".
Lúcia
Lobato hetan kondenasaun iha 2012 ba tinan lima kadeia tanba partisipasaun
ekonómiku iha negósiu ho prejuízu ba Estadu timoroana ho osan dolár 4.200, no
simu iha loron 30 Agostu 2014 indultu ida hosi Prezidente Taur Matan Ruak.
Pedidu
ida hosi "habeas corpus" (libertasaun lalais) rejeita tiha ona hosi
Tribunál Rekursu.
Lúcia
Lobato esplika iha nia karta katak fó instrusaun sira ba advogadu sira
"hodi haruka informasaun foun sira ba Tribunál Europeu hosi Direitu Ema
nian, ne'ebé hala'o prosesu ida hasoru Estadu portugés, no aprezenta ona kesar
ida iha Komité Direitu sira Ema nian iha ONU, no estuda hela opsaun sira hasoru
Timor-Leste no hasoru interveniente sira" iha nia prosesu.
Eis-ministra
konsidera katak hafoin rezolusaun ida ne'ebé "adere ba argumentu sira
hotu" hosi nia defeza, "to'o ona oras desresponsabiliza ema sira hotu
ne'ebé, kaer funsaun sira iha Estadu(...) la halo buat ida hodi hadi'a sala
boot sira ne'ebé akontese hahú iha minutu dahuluk sira" ne'ebé refere hosi
defeza.
Lúcia
Lobato fó hanoin korespondénsia ne'ebé fó sai iregularidade sira no haruka ona
ba Prezidente Repúblika, Governu, Parlamentu Nasionál no majistratura.
"Hosi
karta sanulu resin ne'ebé haruka, laiha resposta ida", nia afirma.
"Ha'u
labele haluha sira ne'ebé kongratula ho funsionamentu regulár hosi ami nia
instituisaun sira justisa nian, ne'ebé metin tebes hodi akuza no prende ona
(eis)ministra justisa ida. Ne'e akontese hafoin indísiu hosi iregularidade sira
ne'ebé fó sai ba públiku", nia subliña.
Maski
sauda no agradese indultu ne'ebé Taur Matan Ruak fó ba nia, Lúcia Lobato fó
hanoin iha justifikasaun hosi desizaun ne'e xefe Estadu "la halo
referénsia ruma ba efetivu estadu" justisa nian no indultu "la
sufisiente hodi hadi'a naran di'ak ne'ebé desizaun kondenatóriu halo tiha
ona".
Lúcia
Lobato garanti katak nia serbisu nafatin hodi hametin setór judisiál no uluk
halo atuasaun hosi la halo foer nasaun no justisa, nune'e nia submete ba
tribunál sira ho "serenidade".
"Maski
nune'e, bele konklui katak sistema justisa timoroan nian ohin loron hanesan
fraku hanesan bainhira hahú nia formasaun. Iha todan ba profisionál sira ne'ebé
iha valór iha área ne'ebé mai iha ita nia rai, ita labele haluha efeitu
perigozu sira, ne'ebé kleur ona iha tempu, akontese iha formasaun hosi ita nia
majistradu sira. Hanesan hahalok sira ne'ebé laiha kompeténsia tékniku hamutuk
ho vísiu hosi prinsípiu étiku-morál elementár sira", nia afirma.
"Nune'e,
ho laran-triste ha'u afirma katak ita nia sistema justisa ohin loron la hanesan
independente, tanba indepedénsia ne'ebé ha'u ko'alia iha ne'e la hanesan ho
independénsia ne'ebé ita hetan iha inan 14 liubá. Ne'e hanesan independénsia
ne'ebé hetan hosi matenek, hosi koñesimentu, hosi estudu. Ohin loron ita sai
hanesan dependente tebes bainhira ita hahú mesak", nia hatutan.
SAPO TL ho
Lusa
Sem comentários:
Enviar um comentário