La Signifika Hirus Malu

Matadalan, editorial

Tinan sanulu ita ultrapasa krizi polítika no militár, iha tinan sanulu nia laran duni mosu fali instabilidade polítika entre líder nasionál sira.  Instabilidade polítika ida ne’e halo populasaun sira nia fuan tuku-tuku no trauma. Tauk situasaun hanesan iha tinan 2006 repete hikas iha tinan 2016.

Problema ida ne’e mosu hahú hosi desizaun Prezidenti Repúblika Taur Matan Ruak halo ezonerasaun ba Maijór Jenerál Lere Anan Timur no mensajen estadu ne’ebé Prezidenti Taur tatoli iha Parlamentu Nasionál ofende líder nasionál hanesan Xanana Gusmão no Marí Alkatiri. Iha nia mensajen, Taur akuza katak votus unanimidade ba orsamentu jerál estadu iha tinan-tinan ne’e atu fó previléjiu de’it ba família Xanana no Alkatiri.

Mensajen ida ne’e soke Xanana, Marí ho sira nia apoiante sira. Ema hotu la espera Taur ko’alia asuntu ne’e iha Parlamentu Nasionál. Haree hosi sikun polítika, Taur hakarak gaña konfiansa povu tanba rona katak Taur mós harii partidu polítiku ona ho naran PLP (Partidu Libertasaun Populár).

Ho ninia mensajen estadu ne’e, hakarak hatudu ba públiku katak Taur maka defende povu nia direitu no kontra iregularidade iha nasaun ne’e. Ne’e hanesan bala musan ida ba Taur atu hakotu rival polítika sira seluk nia polítika iha eleisaun jerál 2017 mai ne’e. Bainhira la joga polítika ida ne’e, difisil tebes ba Taur atu kompete ho Xanana no Marí iha eleisaun jerál mai ne’e.

Iha parte seluk, Taur nia mensajen ne’e mós iha pasu pozitivu ida. Katak, tanba ohin loron laiha ona opozisaun iha Parlamentu Nasionál, entaun Prezidenti Taur tau nia án hanesan opozisaun ida hodi kontrola iregularidade sira ne’ebé akontese iha nasaun ne’e.

Ita iha Provedoria Direitus Umanus no Justisa no mós Komisaun Antí Korupsaun (KAK) maibé sira nia dalan poder polítika sira limita tiha. Sira bele hakilar maibé hakilar ba buat ki’ik sira no hakilar ba ema ki’ik sira komete iregularidade. “Proibidu” hakilar poder polítiku sira ne’ebé komete sala boot.

Tanba ne’e, ho Taur nia mensajen ne’e, fó hikas kbiit ba instituisaun estadu hirak ne’e para bele brani investiga líder hirak ne’ebé Taur temi iha nia mensajen estadu. Labele konsdidera katak Taur nia mensajen mesak negativu de’it. Iha mós ninia pozitivu. Tanba ida ne’e, foti mensajen ida pozitivu para hanesan referénsia ida hodi hadi’a naksalak ruma ne’ebé akontese iha administrasaun estadu.

Líder nasionál sira ko’alia malu ne’e la signifika sira hirus malu. Hanesan aman ba nasaun, sira fó ezemplu ba foinsa’e sira katak iregularidade ne’e virus ida  ne’ebé sei destroi nasaun nia vida iha aban bainrua. Obrigadu. (*)