Implementasaun Programa Saude Eskolar Seidauk Maximu

Diretora Saude Munisipio Dili, Agustina da Costa Saldanha, hateten implementasaun programa saude eskolar iha munisipio Dili seidauk maximu, tanba falta koordenasaun entre Ministerio Edukasaun no Ministeriu Saude.

Nia dehan, programa saude eskolar ne’e importante tebes hodi eduka labarik sira moris saudavel no halo prevensaun ba sira nia aan husi moras infesaun sira hanesan dengue, diarea,ISPA no seluk tan. 

“Ami presiza tuur hamutuk hodi trasa planu ida bainhira ekipa saude tuun ba treinu eskola mos disponivel tempu atu ita bele fahe informasaun,” Diretora Saldanha hateten, iha nia knaar fatin Bairo Formosa, Dili. 

Iha tempu badak, nia dehan, Saude Munisipio Dili hamutuk ho Ministeriu Edukasaun sei organiza workshop ida, hodi diskute planu estrategiku no estabelese programa integradu ba implementasaun programa iha eskola hotu. 

“Ita presiza fahe informasaun ba labarik sira kona ba saude oral, eduka labarik sira oinsa prevene sira nia nehan, fase liman no prevene dengue,” nia hateten. 

Nia hatutan, eskola sai targetu ne’ebe positive tebes tanba labarik sira iha influensia ne’ebe bo’ot tebes iha familia laran. 

Iha parte seluk, Diretor Edukasaun Munisipio Viqueque, Emilio Amaral, hateten tinan ida ne’e (2016) programa saude eskolar seidauk hahu fali, tanba ekipa implementadores seidauk tuur hamutuk halo planu. 

“Uluk ami la’o hamutuk ho ekipa saude sira halo promosaun saude iha eskolas kona ba saude oral ho nia prevensaun, fase liman no imunizasaun, maibe tinan ne’e (2016) seidauk hahu fila fali,” nia hateten. 

Nia hatutan, sira mos servisu hamutuk ho organizasaun internasional hodi fo formasaun ba profesores kona ba edukasaun saude.

The Dili Weekly