FRANCISCO GUTERRES LU-OLO: JUVENTUDE TENKE HAMUTUK SERVI RAI TIMOR

1º KONFRENSIA NASIONAL JUVENTUDE FRETILIN

Prezidente Partidu Istoriku Frente Revolucionária do Timor Leste Independente (FRETILIN), Francisco Guterres “Lu-Olo” liu husi 1º Konferensia Nasional Juventude FRETILIN ho tema “lutar para vencer” ne’ebé  hala’o durante loron tolu hahu iha 12-14  fulan Juño 2016 iha Centro Convencão Dili (CCD)  fanun juventude sira atu  hamutuk ho partidu istoriku FRETILIN hodi servi rai Timor.

Juventude FRETILIN marka nia istoria dala ida tan iha ninia istoria, tanba depois tinan 14 Restaurasaun Independensia Republika Demokratika de Timor-Leste, primeiravez jovens sira halibur malu iha konferensia nasional ida hodi dada lia konaba organizasaun Juventude FRETILIN nian ho nia futuru.

Iha Oportunidade ida ne’e, Juventude FRETILIN hamutuk halo reflexo hodi hamutuk, eduka no mobiliza joven timoroan hotu-hotu atu halo funsaun prinsipal FRETILIN nian hanesan organiza , mobiliza, eduka, respeita no dezenvolve sosiedade ida ne’ebe justa, harmonioza, progresu no paz.

“Joven sira, iha imi nia kabas todan teb-tebes iha politika, istorika no moral nune’e ejije imi  hotu feto ka mane nia reponsavilidade ida bo’ot, responsavilidade ida tuir hanoin Saudozu Nicolau Dos Reis Lobato katak servisu liu tan, haka’as an liutan, matan kroat liutan, fiar an metin liutan, hadok an husi buat ne’ebé hetan ho lalais ho folin baratu, haluha tiha ba ninia a’an deit, fo a’an atu servisu liutan brani liutan, neon matenek liu tan. Ne’e katak, iha hanoin diak ba ita nia povu maubere no Rai TIMOR-LESTE hodi servi nafatin,”afirma prezidente partidu istoriku FRETILIN, Francisco Guterres  “Lu-Olo” iha abertura 1ºkonferensia nasional FRETILIN.

Maske ohin loron iha situasaun ne’ebe mak la hanesan ona uluk, maibe ejije nafatin ba juventude sira atu reforsa partidu, tanba ne’e joven sira nia prezensa iha konferensia ne’e atu hola desizaun hari’i estrutura nasional juventude FRETILIN nian no oinsa atu haforsatan partidu liu  husi atividade saida deit iha nivel hotu hotu.

“Imi juventude  mak futuru partidu nian, imi mak sai nudar motor de aranke partidu nian no imi mak sei “kaer kuda tali” Timor-Leste nian,” afirma Lu-Olo hodi ekonraja juventude sira ne’ebe partisipa iha konfrensia ne’e.

Maske nune’e Prezidente partidu FRETILIN ne’e hateten, ohin loron dezafiu bo’ot ba juventude FRETILIN mak oinsa atu hametin no haburas liutan FRETILIN no nia uma lisan Timor-Leste ne’ebé hanaran República Democrática de Timor-Leste. Tanba ne’e juventude ida-idak tenke iha konsiensia, atu kontribui maka’as hametin no haburas FRETILIN no uma lisan Timor-Leste.

FRETILIN hanesan institusaun ida ne’ebé presiza reforsa husi joven sira feto no mane husi baze to’o iha nasional, nune’e Partidu labele iha deit ninia joven sira bainhira besik ona eleisaun ruma tanba, partidu tenke iha ninia organizasaun juventude ne’ebe iha ninia estrutura rasik atu halo servisu lor-loron iha asuntu oin-oin relasiona ho povu no nasaun nia moris.

Tanba partidu atu iha kbit, ninia joven tenke iha kbit mos konaba konsiensia politiku- partidaria, disiplina partidaria no prinsipiu sira partidu nian ne’ebé orienta hotu-hotu. Tanba moris iha nasaun demokartika tenke respeita vontade maioria povu nian. Iha partidu nia laran ka nasaun. Hala’o refeorsa institusional partidu ninan, ne’e signifika atu halo partidu forte nune’e partidu forte ona demokrasia sei sei reforsadu.

FRETILIN nudar Partidu politika ida ne’ebe moris hori uluk kedas husi kamaradas fundador sira no iha tempu ne’eba mos iha grupu joven barak feto no mane involve a’an ba  mobilizasaun, organizasaun, implementasaun atividade politikus no produsaun nian no joven sira ninia  preokupasaun a’as liu mak buka hatene iha teoria no pratika  no sira sempre halo tuir orientasaun, plano no programa FRETILIN nian.

“Bai-bain ema matenek nain sira hateten “teoria no pratika tenke hamutuk, hahalok no hanoin tenke lao hamutuk nafatin , ita nia pratika mak matan ita nia teoria nian no ita nia teoria mak vida ita nia pratika nian, se ita la tau iha pratika matan ne’e delek no se ita laiha teoria vida ne’e mate, ne’e katak ita labele kolia deit, maibe tenke hatudu ba ema haree, katak ita hatene no bele duni,”reafirma Lu-Olo.

Nia dehan prinsipiu no valor sira FRETILIN nian sei kontinua folin nafatin, maibe ho ninia dezafiu no difikuldade mak oi-oin, liu-liu ba dezenvolvimentu politiku ekonómiku no sosial ne’ebe sei infrenta hela.

“FRETILIN sempre defende prinsipius hanesan prinsipius konta ho ita nia esforsu rasik ho kapasidade tranforma militante ida-idak nian, se ita ida-idak laiha forsa no kapasidade, FRETILIN mos laiha kapasidade no forsa, hakarak ka lakohi tenke mai husi ita idak idak nia laran no wainhira ida-idak iha vontade, hakarak no esforsu atu hala’o atividade, iha ita ni esperensia sira ita hatene katak forsa atu servi partidu, kapasidade atu hala’o partidu ninia atividade, harii no haburas tenke mai husi ida-idak ninia kapasidade, ”hatutan prezidente partidu FRETILIN.

Iha abertura ba konferensia ne’e, Prezidente partidu FRETILIN, Francisco Guterres, Lu’Olo hatutan liu tan katak, iha tempu luta juvens lubuk ida ho sira nia matenek no aten brani organiza malu ho hanoin ida deit ba libertasaun rai Timor Ukun Rasik A’an.

“Molok ha’u atu koalia kona-ba Organizasaun Juventude FRETILIN ohin loron, ha’u hakarak kolia uluk uituan kona-ba Fundasaun Asosiasaun Social Democrátika Timorense (ASDT) iha 1974 , ne’ebe iha tempu ne’eba joven lubuk ida ho idade imi nian, hodi sira nia matenek no aten brani organiza ho halibur ideia tuir dalan  ida deit maka ukun rasik-an ba povu maubere no Rai Timor-Leste liu husi dalan libertasaun nasional, Joven sira ne’e maka hanesan  Nicolau Lobato, Marí Alkatiri, Ramos Horta, Justino Mota no Borja da Costa, ikus mai sira seluk mos tama  atu haforsa liutan ASDT, nune’e iha loron 20 fulan Maio 1974, moris ASDT hanesan asosiasaun ida no iha loron 11 fulan setemebru tinan hanesan, dissolve tiha ASDT no fo fatin ba harii Frente Revolusionariu do Timor-Leste Independente (FRETILIN),” dehan Lu’Olo.

Prezidente partidu istoriku ne’e haktuir iha tempu ne’eba Comite Central FTREILIN nian ho matenek deside harii organizasoens de massa hanesan  Organização Popular da Juventude de Timor (OPJT) iha fulan Juñu tinan 1975 no iha fulan agostu tinan hanesan hari’i mos Organizão  Popular da Mulher Timor (OPMT) ne’ebé ho hanoin no prinsipiu ba libertasaun no dezenvolvimentu.

Liu husi biban ida ne’e prezidente partidu FRETILIN, apela ba juventude FRETILIN  atu halo esforsu maka’as hodi aumenta koñesimentu no kapasidade atu halo partidu FRETILIN forte liutan no atu kumpri saida maka promete ona ba rai no povu maubere hanesan Libertasaun rai no libertasaun povu. Jovens sira tenke dinamiku mós, atualiza a’an nafatin tuir evolusaun no realidade mundu ne’ebé ita moris ba. Tanba ne’e partidu mos sei kria mekanizmu ida kapas atu atividade sira hotu-hotu tenke la’o tuir mekanizmu partidu nian. (***)

Jornal Nacional