HALIKU Ajuda Ona Vitima Kankru 62

Grupo Hau Hili Atu Kura (HALIKU) konsege ajuda no halo ona referral ba pasientes kankru susun nain 62 ba fasilidade saude.

Maske nune’e, Koordenadora Grupo HALIKU, Isabel de Lima, hateten programa sosializasaun no identifikasaun seiduak maximu tanba falta rekursu humanus inklui finanseira. 

“Husi 62 pesoas ne’e, iha nain 32 mak konsege halo tratamentu iha fasilidade saude, seluk lakohi halo tratamentu,” nia hateten iha serimonia entegra ofisialmente grupo HALIKU ba Fundasaun Alola, iha Dili.  

Grupo HALIKU rasik harii iha dia 14 Fevereiru 2014 no durante tinan rua (2014-2015) nia laran, de Lima hateten HALIKU fo formasaun ba voluntario nain 40 resin sai lian ba grupo ne’e hodi sosializa informasaun ba komunidades, liu-liu ba feto sira kona ba sintomas no lala’ok moras kankru susun no serviks.

Nia  dehan, iha tinan rua (2014-2015) HALIKU mos fo ona formasaun ba voluntraio nain 40 resin hodi sosializa informasaun ba komunidade liu –liu feto sira kona ba sintomas no lala’ok moras kankru susun no serviks. 

Enkuantu grupo HALIKU ofisialmente integra ona ba iha Fundasaun Alola, e tuir de Lima, ida ne’e importante tebes tanba Alola iha rede servisus iha munisipio hotu, no programa sosializasaun sei la’o ho efetivu liu.

Entretantu Fundadora Fundasaun Alola (FA), Kirsty Sword Gusmão, espera ho integrasaun ida ne’e HALIKU nia programa sai efetivu no informa diak liu tan ba feto sira kona ba moras aat ida ne’e. 

“Hau fiar HALIKU nia servisu sei sai efetivu liu tan, informa feto maluk sira kona ba moras kankru susun no moras seluk ne’ebe afeta ba feto maluk sira,” nia esperansa. 

Hanesan sobrevivente moras kankru susun, nia husu ba feto sira atu labele tauk no moe aprezenta aan ba mediku sira bainhira deskonfia moras ruma iha isin lolon.

“Hakarak salva ita nia moris, labele tauk no moe, tenke iha aten brani buka opsaun oioin hodi salva moris liu husi tratamentu,” nia enkoraja. 

Grupo HALIKU estabelese husi sobrevivente (kankru) sira, ho objetivu atu sosializa no eduka komunidade kona ba sinais moras kankru no prosesu tratamentu, tanba maioria komunidade liu –liu feto sira laiha konesementu ba moras ida ne’e.  

Durante nia vizita iha Timor, eis Primeira Dama mos atende eventu lubuk ida inkui serimonia ida ne’e. 

Iha okaziaun ne’e Gusmão mos entrega nia Medalia de Ordem husi Timor-Leste ne’ebe mak nia simu iha tinan kotuk (2015) ba Diretora Ezekutivu FA, Alzira Reis hodi dehan, kondekorasaun ida ne'e hanesan rezultadu husi eforsu ekipa nian.

Iha parte seluk espesialista ginecologia doutor Jose Antonio, hateten pasiente barak mai fasilidade saude bainhira tama ona stadium hat, entaun medikus labele halo buat ida ona. 

“Ne’e la’os falta informasaunm, maibe tanba moe,” doutor Zeto hateten.

Nia hateten, ema barak moe, tanba realidade sira ne’ebe nivel edukasaun no sosial ekonomia aas maibe la mai fasilidade saude e ba fali halo tratamentu tradisional nian.

“Hau la hatene, imi rona buat ida “anion” ema barak halo to’o labele ona foin ba ospital e ita labele halo buat ida,” nia dehan. 

Nia informa, moras kankru susun, tee oan no serviks sira ne’e registu ne’e barak liu tanba fator genetiku no mos fator kontribui sira hanesan la fo susu oan hafoin partus.

The Dili Weekly