Líder sira ASEAN nian sei analiza Timor-Leste nia adezaun iha setembru

Líder sira ASEAN nian sei analiza iha fulan-setembru relatóriu tékniku ne’ebé sekretariadu organizasaun kona-ba adezaun Timor-Leste nian prepara, tema ne’ebé marka enkontru sira iha semana ne’e entre primeiru-ministru timoroan ho líder rejionál sira. 

Fonte sira Governu timoroan nian hatete ba Lusa katak tema adezaun ne’e marka parte hosi ajenda enkontru bilaterál sira ne’ebé Rui Maria de Araújo mantein iha loron hirak ikus ne’e ho nia omólogu sira hosi Malázia, Kamboja no Vietname.

"Mantein nakloke kona-ba adezaun Timor-Leste nian ba ASEAN iha fulan-setembru tinan ne’e, iha Laos, líder polítiku sira ASEAN nian sei deside kona-ba relatóriu tékniku ne’ebé Sekretariadu ASEAN nian prepara no hosi ne’ebá mak sira sei foti desizaun kona-ba adezaun formál", esplika fonte sira.

Enkontru sira hala’o iha rihan hosi Fórum Ekonómiku Mundiál kona-ba ASEAN, realiza iha Kuala Lumpur iha semana ne’e no iha ne’ebé debate rejionál sira konta ho partisipsaun tomak hosi delegasaun timoroan sira, ne’ebé aleinde xefe Governu inklui ministru Estadu Koordenadór Asuntu Ekonómiku ho vise-ministru Negósiu Estranjeiru.

Iha enkontru bilaterál hirak ne’e líder rejionál sira "manifesta solidariedade no disponibilidade hodi kontinua sai parseiru Timor-Leste nian, inklui iha apoiu ba adezaun formál ba ASEAN", refere fonte hirak ne’ebé hanesan.

Apoiu hanesan hosi parte primeiru-ministru Singapura nian, ne’ebé ho Rui Araújo hasoru malu ohin, ne’ebé mós "repete apoiu ba parseria ho Timor-Leste, manifesta nakloke hodi reforsa kooperasaun iha área ezistente oioin, inklui iha vertente kapasitasaun rekursu umanu no iha área ekonómika".

SAPO TL ho Lusa