Hosi
Cancio “Cassimata” Ximenes*, opiniaun
Bibi-oan: Tanba
saida maka ema moris ne’e tau naran oin-oin. Maibé, ita moris mai ne’e tau
naran ida de’it maka “bibi”.
Bibi-Inan: Sira
nia naran bele tau naran oin-oin maibé wainhira mate sira nia naran ne’e ida
de’it maka “matebian”. Maibé, wainhira ita (bibi sira) maka mate, ita nia naran
ne’e sai barak tebes maka “bibi-tunu, bibi-lalar, bibi-sona, bibi-tokir, bibi
daan, no oi-oin de’it.”
Bibi-oan: Hmmm?!?
Ha-ha-ha.
Ha’u halo finji (sengaja) foti ilustrasaun simples ne’e hodi hakaben
ho diverjensia polítika ne’ebe akontese iha palku polítika Timor-Leste daudaun
ne’e. Polítika oin-oin, partidu oin-oin, objetivu ida de’it maka serbisu ba
interese nasionál. Hosi polítika oin-oin no partidu oin-oin, ho sira nia
interese rasik/partidu, sira bele kria jogadas polítika hodi lori polítika
na’in balun hanesan “ema” ne’ebé mate ho naran polítika ida de’it maka naran
“matebian”. Maibé, la taka dalan, polítika na’in balun mós mate hanesan “bibi”
ne’ebé sira hetan naran rebo-rebo ho naran polítika “bibi-tunu, bibi-lalar,
bibi sona, bibi-tokir, bibi-daan, nsst”.
Lalika
helik tan. Lala’ok polítika hamate malu nani-da’et ba malu hosi ida ba ida seluk.
Hahú hosi polítika ezonerasaun ba Major Jeneral Lere Anan Timur—nomeisaun
Filomeno Paixão no Pedro Klamar Fuik—estende Lere Anan Timur ba Tinan rua,
Prezidenti da Repúblika Taur Matan Ruak hatoo mensajem estadu iha PN hatete
Eis Líder Rezisténsia Xanana Gusmão no Dr. Marí Alkatiri hetan previleiju
boot iha kontratu estadu nian, Xanana fó fila medala Orden de Colar ba PR, CNRT
divorsiu ho PD iha bolku koligasaun, CNRT eziji Prezidenti Parlamentu Nasionál
Vicente Guterres husik nia kargu nu’udar Prezidenti PN, CNRT eziji membru
governu hosi PD sai hosi governasaun, PD desidi hili nu’udar independente, no
CNRT alerta makaas hodi eziji ba governu atu membru governu sira hosi PD tenki
sai hosi governasaun.
Drama
polítika hirak iha leten ne’ebé akontese daudaun iha palku polítika Timor-Leste
nia leten ne’e, refleta kedas liafuan murak hosi dialeitu Makasae ne’ebé ha’u
sita iha artigu ne’e nia titulu “Dura Mumu Tetak, Ata Meti Tana—Laho Tetak
(han) Besi, Ahi Han Tasi”. Tuir lojika, Laho labele han besi no ahi labele han
tasi. Maibé, polítikamente buat ne’e bele sai realidade. Polítika bele halo
buat ne’ebé imposivel sai sai posivel. Atu atinji sira nia objetivu polítika
ida, polítika na’in sira sempre uza meus ka dalan saida de’it hodi hadau sira
nia mehi.
Dalaruma
mehi atu sai boot (lider) no mehi atu hadau kadeira (tuur iha kadeira luxu),
polítika na’in sira tenki halo ema seluk sai mutun ba sira nia polítika. La
koalia sala. Jogadas polítika hirak iha leten ne’e, lori polítika na’in sira
mout iha polítika “Dura Mumu Tetak, Ata Meti Tana” (imposivel). Katak,
polítika na’in sira ne’e hamriik ia palku polítika nia leten, rame-rame
hatudu ba povu Timor-Leste tomak hodi halo “onani polítika” atu atinji “orgasme
polítika no “orgasme póder” (liafuan ne’e la existe iha disonariu siénsia
polítika nia laran maibé iha no real iha realidade polítika). Hamriik araska,
mate lais. Mate lais, hamriik araska. Hatama lais, sai kleur. Hasai lais,
hatama kleur. Hatama kleur, mate mós kleur. Katak, ho intensaun sira hakarak
haree lalais lalehan no dudu ema seluk ba inferno laran—sira iha mehii-boot
hakarak harii lalehan no harii inferno iha tinan 2016 ne’e ba oin.
Só,
mehi atu harii lalehan ka harii inferno iha Timor-Leste, polítika “Dura Mumu
Tetak, Ata Meti Tana—Laho Tetak (han) Besi, Ahi Han Tasi” (onani polítika) ne’e
lori povu Timor-Leste tomak sai hanesan “Laho” ne’ebé tetak (han) besi sai
tohar arbiru no sai hanesan “Ahi” ne’ebé han tasi sai mutuk didiak. Povu wa’in
dezanima hodi dehan “husik ba!”. Maibé, povu balun ibun katar tuur hodi tarata,
dulas ibun, fó-hamnasa, fó-tanis, fó-malisan, no fó-merese ba hirak
ne’ebé aplika lala’ok “onani polítika” no hirak ne’ebé sai tiha ona mutun
(vitima) ba polítika refere—tanba sira halo polítika la’os ba povu nia interese
maibé ba sira nia interese rasik.
Maibé,
ho hanoin pozitivu, loloos ne’e ita labele fó-hamnasa no fó-malisan ba lala’ok
polítika hirak ne’e. Ho laran maus no ho neon matenek, ita tenki kaer-metin no
aprende hosi Dalen Latina ne’ebé haktuir katak “Humanas Actiones Ridere,
Non Lugere, Neque Destari Sed Intelligere”. Katak, ema nia lala’ok ita
labele fó-hamnasa (ditertawakan), labele fó-tanis (diratapi), no labele
fó-malisan (dikutuk), maibé tenki buka atu kumprende (dimengerti). Ita tenki
kumprende polítika la’os polítika maka kumprende ita. Tanba, ita tenki
kumprende katak ho “onani polítika” hirak ne’e maka lori Timor-Leste mout hela
iha krize boot rua (2) maka hanesan; (1) krize kualidade estadista nian no (2)
krize kualidade ezemplu (modelu) nian.
Fiar ka lafiar, ne’e imi nia “urusan”. Nune’e ka lanune’e, depende ba
imi ida-idak ninia interpretasaun. Maibé, atu hatete de’it katak Timor-Leste
oras ne’e hasoru ka hetan “defisiensia kualidade estadista nian” no “kualidade
ezemplu nian” tanba atu responde ba krize ne’e, ita nia frakeza maka kurang iha
hahalok (modun) kualidade estadista nian no kualidade ezemplu nian iha
lider-elit [polítika] sira.
Kualidade
estadista nian maka karákter, hahalok (modun), vizaun, no orientasaun ne’ebé
tau iha oin valor nasionalidade no demokrásia liu interese ego lider ida nian.
Lider ida iha klamar estadista se wainhira nia hanoin buat ne’ebé di’ak liu ba
nasaun no kaer-metin komitmentu atu fó buat ne’ebé di’ak liu ba nasionalidade,
demokrásia, no umanidade universal liu-hosi profisaun ne’ebé nia haknaar-án bá.
Ita nia rain defisil atu hadeer ho kbbiit ne’ebé forte liu no dalan (diresaun)
ne’ebé naroman wainhira lider sira la alsema-metin ho fanatizmu grupu no
orientasaun póder.
Lideransa
ne’ebé iha espiritu kualidade estadista nian nu’udar fatór ida ne’ebé determina
no stratejia atu konsolida forsa nasionál, hakiak momentum reformasaun, dudu
prosesu demokratizasaun, no hatudu (halalo) movimentu konjunta ba oin.
Lider-estadista maka bele lori nasaun ne’e tama ba laloran kompetisaun global.
So lideransa forte, iha dignidade, no iha karákter estadista bele tandu (lori)
sivilizasaun no progresu ba ninia nasaun—lider matenek, povu mós sei matenek.
Bele
sai hanesan dezastre nia hun se lider nasaun ida iha obsesaun ba póder
de’it entaun sei la foku ba esforsu tomak atu atinji objetivu nasionál. Ninia
rezultadu maka lider hirak ne’e hanesan politikus ne’ebé halimar iha palku
polítika nia leten hodi póder nia naran duke sai estadista ne’ebé utiliza póder
ba povu. Nasaun Timor-Leste presiza lideransa nasionál ne’ebé kredivel, iha
integridade, no iha klamar estadista atu responde ba sasadik (tantangan)
oin-oin be sei mosu mai. Ba ida ne’e, presiza lider (estadista) ne’ebé iha “mission-driven” (ho
misaun prinsipal lori nasaun ne’e sai-hosi problema/krize) no kompetente maneja
no hatudu rekusru.
Lider-estadista
hakarak no iha kapasidade foti desizaun ne’ebé moos ka firme (la’os otoriter)
no brani foti desizaun maske la popular maibé importante maka foti desizaun
bazeia ba interese maioria povu nian—lider ho karákter forte no firme iha mehi
atu lori no nasaun no povu ba hetan moris di’ak (susesu). Tanba ne’e, hahú ohin
ba oin, lider ne’ebé ita hein maka lider ne’ebé iha kualifikasaun
lider-estadista (pemimpin-negarawan)—lider nasionál la’os naran fó de’it
pozisaun/póder maibé prinsipal maka ema ne’ebé iha kapasidade, integridade, iha
kbiit visioner, no ninia kualidade estadista nian tanba póder ne’e fó
hosi povu (hanesan na’in ba soberania) atu maneja nasaun ne’e.
Lideransa
nasionál loloos ne’e tenki figura ne’ebé fiel ba rai doben Timor-Leste
[Konstituisaun RDTL] ho sira nia dedikasaun tenki hatudu ka tau ba oin hahalok
kualidade estadista nian, la’os figura ne’ebe hakarak goza de’it póder ho folin
medial (meiu), la’os final (objetivu). Objetivu final póder ba lider nasaun
nian maka “fó fila fali ba póder nia na’in maka povu” liu-hosi forma matenek,
justisa sosial, moris-di’ak, no moris hakmatek (dame).
Atu
hetan moris-di’ak no moris iha dame la’os de’it ho lider-estadista ne’ebé fiel
maibé ita labele abandona lider-ezemplar (agora ita krize ba lider-exemplar).
Oinsa mak lider ida bele lori povu ba objetivu konjunta se lider refere la’o
iha vizaun ne’ebé nakukun, la’o ho frakeza karákter ne’ebé la’o saruntu arbiru
de’it—oinsa maka nia bele lori povu ba objetivu konjunta se nia rasik laiha
kapasidade atu fó exemplu ka sai ezemplar di’ak ida?
Atu
sai lider [ezemplar] ne’ebé iha kualidade ezemplu nian ne’ebé diak, lider tenki
hahí no hanai elementu tolu (3) lideransa nian ne’ebé importante maka hanesan;
(1) kompetensia (professional), (2) sensivel/tau-matan ba ema sira ne’ebé nia
lidera, no (3) integridade pesoal ne’ebé tau-ás ka hahí hahalok tenki tuir
liafuan. Atu sai lider-ezemplar, ema ida tenki iha integridade no komitmentu
ne’ebé forte atu lidera ho loloos, onestu no edukadu. Matenek na’in T Richard
Chase hakerek “If a leader demonstrates competency, genuine concern for
others, and admirable character, people will follow”.
Raelidade
polítika “Onani Polítika: “Dura Mumu Tetak, Ata Meti Tana—Laho Tetak (han)
Besi, Ahi Han Tasi” (imposivel) ne’ebé habiban “orgasme polítika no orgasme
póder” hatudu mai ita dimensaun ne’ebé kontradiktivu ho lideransa ideal ne’ebé
tau iha oin “kualidade ezemplu nian”. Ema wain hatete fenomena KKN ne’ebé
akontese no hahalok koruptivu hosi leten mai kraik hakanek povu Timor-Leste nia
konxiénsia no sentimentu justisa sosiedade nian, ne’e la’os ezemplu di’ak. Krize
Kualidade ezemplu nian mós haburas hosi tendensia elite polítika ne’ebé forte
atu hadau (kassa) ka tuba-netik (mempertahankan) sira nia póder—sira haluha
katak polítika ne’e luta ba objetivu konjunta ho póder nia kbiit ne’ebé povu fó
ba sira.
Povu,
hanesan na’in ba soberania no póder nia na’in, senti no hein katak polítika
na’in sira halo “onani polítika” hodi hadau “orgasme póder” karik, tenki bazeia
ba formula aplika (halo) polítika dezenvolvimentu tuir etapa. Etapa dahuluk
maka (1) lideransa instruksional ne’ebé tau póder ne’e ás liu (leadership by
power)=dezenvolvimentu “hosi governu, mai hosi governu, ba povu”. Etapa daruak
lideransa ne’ebé involve no fó korajen/dudu (engaging and encouraging
leadership) ne’e hahí ezemplar/keteladanan (leadership by example)=dezenvolvimentu
hosi governu hamutuk ho povu, mai hosi governu hamutuk ho povu, ba povu”. No,
etapa datoluk maka manifestasaun soberania povu (povu nia soberania) atinji
fatin, iha ne’ebé sistema demokrásia la’o ho di’ak tebes, ne’e lideransa
suportivu/stimulativu ninia kbiit atu tau ezemplu iha oin=dezenvolvimentu ”hosi
povu, hosi governu hodi povu nia naran, ba povu”.
Ita
tenki konkorda ho peritu lideransa Jhon c Maxwell (The Power of Leadership,
2001) ne’ebé hatete katak “The most effective leadership is by example,
not edict”. Ema sei aprende no sei halo-tuir hosi saida maka ema ne’e
haree-hetan tuir Maxwell nia liafuan “A leaders credibility and his right
to be followed are based on his life”. Baibain tradisaun ida ne’e defisil
ita haree iha lideransa polítika maibé hahalok ida ne’e ita bele haree-hetan
iha lideransa militer sira nian—militer kuñese filozofia lideransa ho ninia
formula “follow me!” (tuir ha’u). Komandante halo buat diak, soldadu
sira sei halo buat di’ak. Hein katak filozofia “follow me!” bele sai
modelu ba lideransa polítika sira bele fó ezemplu di’ak atu nune’e povu mós
bele moris banati hodi dehan “follow me!”.
Ezemplu/ezemplar,
liafuan ida ne’ebé fasil atu hatete, maibé nu’udar “meus moris nian” ne’ebé
defisil tebes tau iha implementasaun. Maibé, ita hein katak liafuan ne’e sinal
“moral-etis” no sai matadalan ba lider ida-idak iha Timor-Leste. Espera katak,
povu nia mehi atu ba hetan lider-estadista ho kualidade estadista nian be
natoon no bele hetan lider-ezemplu [ezemplar] ne’ebé sai modelu di’ak ba Timor-Leste
nia futuru.
Hein
katak hahalok polítika “onani polítika” ne’ebé rezulta “orgasme polítika” ba
atinji “orgasme póder” be akontese daudaun ne’e, bele kria lalehan (dame) maibé
labele kria tan inferno (krize 2006 epizode-II) iha Timor-Leste ne’ebé lori povu
sira mate hanesan bibi ne’ebé hamosu naran “bibi-tunu, bibi-tokir, bibi daan,
bibi sona, nsst. Artigu ida ne’e hela hanesan reflesaun ida atu ita bele
refleta hamutuk hodi hateke ba oin hodi kaer-metin ba filozofia “mehi hamutuk,
mehi ba povu nia mehi”. (*)
*Matadalan
Sem comentários:
Enviar um comentário