DOM VIRGÍLIO DO CARMO DA SILVA: AMU-LULIK TENKI SAI BIBI ATAN DI’AK KRISTU NIAN

Bispu Diocese Dili Dom Virgílio do Carmo da , SDB hateten katak, sai amu-lulik tenki sai bibi atan di’ak no servidor ba  Kristu nian hodi simu responsabilidade, atu  harii Maromak nia reiñu iha rai ne’e.

Dom Virgílio do Carmo da Silva haklaken lia hirak ne’e, wainhira prezide  misa ordenasaun  Sacerdotal, Padres  Carmelitas nain tolu, Fausto Tilman de Araújo, Agostinho Exposto no  Carlito da Costa Araújo, iha igreja Nossa Senhora Maria Imaculada da Conceição Katedral Dili, Sábadu  (9/7).

Dom Virgílio esplika katak, atu  servi  ne’e  dimensaun  ida  esensial,  ne’ebé la’os  parte  ida  de’it  husi  ema  nia  moris.

“Tamba  Jesus  rasik  dehan, “Ha’u  mai  atu  servi  hodi  fó  Ha’u  nia  moris  tomak”. No  sente  iha  responsabilidade no sentidu solidaridade ba  ema  seluk, wanhira haree maluk  ne’ebé  iha  nesesidade  keta  halo  finji  hanesan la haree, tamba  ita  nia vokasaun  mak atu servi,” dehan Dom  Virgílio.

Dom Virgílio hatutan tan katak, servi, la’os  de’it ba hirak  ne’ebé  iha  nesesidade, maibé  akomoda  simu  no  hatudu   interese  ba  ema  hotu  no  ema  hirak  ne’ebé  hakbesik  ba  Jesus. La’os  de’it  ba  sira  ne’ebé  iha  problema, maibé  tamba  ema  hotu  buka  nia  no  nia  la  eskolha ema  ida  husi  nia  misaun.

Tuir Dom Virgílio  katak, ema  ne’ebé  Maromak  fihir  no  konsagra  atu  halo  Maromak  nia  domin  hodi  daet  ba  ema  hotu, tamba  amu-lulik sira  ne’ebé mak Maromak  bolu  ne’e  atu  hatutan  Kristu  nia  prezensa  úniku  no  pastor  ne’ebé  aas  liu  hotu  hodi  tuir Kristu nia hadomi  moris  iha  nia  bibi  sira  nia  leet.

“Nune’e  sira  na’in  tolu  nia  prezensa  atu  fó  hanoin  nafatin  ba  ema  hotu  konabá  Maromak  nia  prezensa, tamba Maromak  nia  oan  mai  la’os  atu  servi  nia, maibé  atu  servi  nia  povu  no  fó  nia  moris  atu  ba  ema  seluk  nia  di’ak, inklui  atu  servi  altar  no  servisu  oi-oin  ba  uma  kreda  ninia”, Dom Virgílio hateten.

Dom Virgílio dehan, vokasional ida ne’e úniku, tamba  mediante  konsagrasaun  sakramental  amu-lulik  simu  Dom  ida  ne’ebé  kbi’it  espíritual  nian  ba  partisipasaun  iha  autoridade  ida  ne’ebé  Jesus  Kristu  iha  nia  kreda  no  kbi’it  espíritu  nian.

“Tantu padre ‘ tolu ne’e ida-idak mai ho ninia moto hanesan  Pe.Fausto Tilman de Araújo ho nia moto “Ita hatene Ha’u  Nai”, katak, ita hatene Ha’u hadomi ita, maske ita hatene Ha’u iha limitasaun, Pe. Agostinho Exposto “Sé o hadomi  Ha’u” katak  sé o  hadomi  ha’u  tau  matan  ba  ha’u  nia  bibi  sira, no Pe. Carlito  da  Costa  Araújo  “Tama  klean  liu  Ba”  katak, o  deskobre  domin  ne’e  furak, maibé  seidauk  to’o  hodi tama ba klean liu ba atu o nia domin la’os superfisial  de’it, maibé tenki tama to’o iha klean no atu bele komprende katak sa”, Dom Virgílio esplika.

Misa ordenasaun Sacerdotal Carmelitas  alénde partisipa husi  Bispu Diocese Dili, Dom Virgílio do Carmo da Silva SDB, Bispu Diocese Baucau Dom Basílio do  Nascimento, padres  konselebrantes, inan aman  no  familia husi Aileu seloi  kraik, Letefoho Lauana, Hatuudu Beikawa, formadores sira  husi  orden Carmelita Komisaria Indonesia Timur Flores, provinsial  orden Carmelita Australia iha Timor Leste ho nia konselleiru  no sarani sira.tos

Jornal Nacional