FRETILIN HILI MEMBRU 65 BA CCF

VI kongresu nasional partidu FRETILIN ne’ebé hala’o durante loron tolu (7-9 Outubru 2016) iha Centro Convenções de Díli (CCD), ba loron ikus nian hodi hili membru permanente 65 ba Comite Central FRETILIN (CCF).

Alénde ne’e kongresista sira mós hili membru na’in 7 ba Komisaun Jurídiku no ema na’in 25 ba membru suplentu CCF no komisaun jurídiku suplentu ema na’in 2. Mekanismu eleisaun ne’e hala’o liu husi vota aklamasaun ga hit liman deit.

Sekretariu Jeral Partidu FRETILIN Mari Alkatiri hateten katak, iha konferensia ne’e hatudu katak FRETILIN hatudu ona wainhira koalia, koalia ho laran ho fuan ho klamar atu bele buka nune’e iha momentu ikus mai atu hetan solusaun.

“Ha’u hanesan Sekertariu Jeral, ha’u mós hanesan fundador ba organizasaun ida ne’e ha’u bele dehan ha’u sai husi kongresu ida ne’e sente katak ita bele la’o duni ba oin, ita hotu-hotu bele la’o ba oin tanba ita hotu sai husi kongresu fiar malu ladun metin maibé normal. No ita bele la’o duni ba oin tanba, ita hotu hatene katak ita só bele manan iha 2017 wainhira ita hamutuk atu hasoru dezafiu ida ne’e, ho ita nia vitória maka ita bele lori dezenvolvimetu ba ita nia rai doben ida ne’e,” dehan Marí Alkatiri iha últimu dia Kongresu Partidu FRETILIN ba dala IV iha CCD, Domingu (09/10/2016).

Marí Alkatiri hatutan katak, iha tinan 10 ona FRETILIN la ukun maibé fó kontribuisaun ba paz no estabilidade iha rai ne’e. FRETELIN la ukun maibé la dudu povu ba dalan konflitu hodi manan ida ne’e. FRETILIN lakohi, FRETILIN hakarak ukun maibé povu maka tenki hili ida ne’e maka FRETILIN.

“Agora ita haree kulat polítika komesa moris bar-barak maibé ita la hatene lós ida ne’ebé maka kulat di’ak no ida ne’ebé maka la di’ak, haree partidu bar-barak, tanba ne’e kamarada sira ita presiza tun ba baze atu labele husik ema ho lian bosok, ema ho ameasa, ema ho intimidasaun atu hatauk ita nia militantes sira, atu hatauk ita nia povu hodi hili votus, to’o tempu ona ita prepara-an ba eleisaun 2017,” dehan Alkatiri.

Iha fatin Prezidenti Partidu FRETILIN Francisco Guteres “Lu-Olo” hateten katak, ho tomada de pose ba membru Comite Central FRETILIN i membru sira ne’e foun no sira iha mandatu hahú husi 2016-2021.

“Ha’u fiar katak ha’u nia membru sira Comite Central ne’e sira ho kapasidade bo’ot teb-tebes para atu kaer partidu ne’e forte liu tan, para atu hadia partidu ne’e, nune’e partidu ne’e bele sai hanesan instituisinalizadu nune’e bele funsiona di’ak liu tan iha tempu oin mai, partidu ho programa ne’ebé di’ak tebes i ami sei buka para hadia di’ak liu tan,” dehan Lu-Olo.

Lu-Olo hatutan katak, delegadu sira ne’ebé mai kongresu kontribui ho ideias ne’ebé di;ak konaba asuntus importante barak ne’ebé deskuti, liu-liu konaba alterasaun ba estatutu manual programa polítika FRETILIN nian, bele mós hanesan aprova rezolusaun importante liu-liu konaba estratejia polítika ne’ebé FRETILIN lori hodi avansa ba iha 2017.nes

Jornal Nacional