Guterres sei "fó atensaun liu" ba nasaun sira lian portugeza nian - CPLP

Sekretáriu-ezekutivu CPLP nian felisita ona iha loron-kuarta ne'e antigu primeiru-ministru portugés António Guterres tanba nia indikasaun ba líder ONU nian, hodi hatudu konfiansa katak nia sei "fó atensaun liu" ba nasaun sira lian portugeza nian, "liuliu ba nasaun afrikanu sira".

"Ha'u la hatete [katak ita] sei hanesan ida ne'ebé nia hadomi liu, maibé [sei] fó oportunidade ida ba problema sira ne'ebé ita hasoru", Murade Murargy hatete iha deklarasaun sira ba jornalista sira bainhira hakotu semináriu hosi komemorasaun ba tinan 20 hosi Komunidade Nasaun sira Lian Portugeza nian (CPLP) ne'ebé hala'o iha Asembleia Repúblika portugés nian, iha loron-kuarta, iha Lisboa.

Sekretáriu-ezekutivu CPLP nian, ne'ebé to'o ohin loron seidauk ko'alia kona-ba Guterres nia indikasaun tanba seidauk hanesan ofisial, admiti ona katak antigu primeiru-ministru agora "besik ona eleitu", nune'e maka fó ona felisitasaun.

"Hanesan sekretáriu-jeral hosi ita nia komunidade. La'ós de'it hanesan sekretáriu-jeral hosi ONU ka hosi Portugal maibé mós hosi ita nia komunidade tomak", nia afirma.

Nia konsidera ona katak Guterres hanesan "ema ida ne'ebé iha pozisaun di'ak hodi kaer" ONU, liuliu "iha faze mudansa, hosi sékulu foun (...). Presiza hanoin foun sira".

Kona-ba impaktu ba CPLP ne'ebé mosu hosi eleisaun ba sidadaun ida lian portugeza nu'udar sekretáriu-jeral ONU nian, Murargy hatete: "Ha'u hanoin katak nia sei fó atensaun liu ba ita nia nasaun sira liuliu ba nasaun afrikanu sira, ne'ebé iha hela problema sira, liuhosi organizasaun oioin ne'ebé nia sei kontrola".

António Guterres sei konfirma iha loron-kinta ne'e ba kargu sekretáriu-jeral ONU nian iha Asembleia-Jeral, hafoin hetan ona indikasaun hosi Konsellu Seguransa, iha loron 05 Outubru.

Guterres sei troka Ban Ki-moon iha loron 01 Janeiru 2017.

SAPO ho Lusa