KFP Prosesa Profesores Reformadu 700

DILI - Diretóra Jerál Komisaun Funsaun Públika (KFP), Maria de Jesus Sarmento hatete, KFP oras ne’e prosesa hela profesores 700 ne’ebé maka atu tama ona ba reforma. 

“Númeru Profesór sira iha komisaun funsaun públiku hamutuk rihun sanulu atus hitu haat nulu resin sia (10.749) maibé agora dadauk prosesa hela profesores atus hitu (700) ba reforma tanba tuir lei idade 60 tenke reforma ona,”hatete Maria ba Jornalista sira iha Centru Convensones Dili (CCD), Tersa, (11/10).

Maria hatete, Mayoria profesores sira ne’ebé komisaun prosesa hela nia reforma barak liu professor sira ne’e hanorin iha lingua portugues. Profesór sira ne’e mesak iha esperiensia makas iha lingua portugues.

 Agora dadaun nia parte haree katak ministériu edukasaun mós komesa fó hela formasaun ba Professór sira, nune’e sira bele troka fali hosi Professór sira ne’ebé maka atu tama ba reforma.

“Ministériu edukasan konsege hatama duni profesores rihun haat atus haat rua nulu ba kontratadu, maibé rihun tolu resin maka hetan ona kontratadu, sira rihun tolu resin ne’e maka tama ona formasaun,”hatete Maria.

Tanba ne’e tuir komisaun nia haree preparasaun ne’ebé ministeriu edukasaun halo kapas tebes atu nune’e profesór foun sira bele troka fali profesór sira ne’ebé tama ona reforma.

Verifika Dadus Reklamantes

Iha parte seluk, Ministériu Edukasaun (ME) mós hahú hela halo verifikasaun ba dadus profesores reklamantes sira iha Timor laran hodi hatene lolos katak profesór sira ne’e sei ativu ou lae.

“Agora dadaun ne’e sei halo verifikasaun ba dadus Profesór reklamadus sira ne’ebé maka oras ne’e hanorin hela iha eskola sira iha Timor laran,”hatete Vise Ministra Edukasaun Primeiru, Dulce de Jesus Soares iha Centru Convensoes Dili (CCD), Tersa, (11/10).

Dulce hatete, objektivu hosi verifikasaun ida ne’e atu hatene lolos totál profesores reklamentes tanba iha profesór balun maka la ativu hanorin ona maibé kontinua hatama sira nia reklamasaun.

“Ezemplu hanesan problema ida akontese iha munisípiu  Bobonaro, iha ema ne’ebé maka naran atu tama ba kontratadu laiha fali maibé ema ne’ebé la tama iha kontratadu maka iha fali. Ida ne’e problema ida ne’ebé ministériu edukasaun infrenta,”dehan dulce.(fer)                   

Timor Post