S-DESK Komemora Masakre BALIBO FIVE Ba Dala 41

DILI, (ANTIL) - Sentru Direitu Ekonómiku Sosial Kultural (S-DESK), hanesan sentru profesional ba peskiza no formasaun Jornalizmu multimedia, sei realiza Marsa Ba Paz hodi komemora masakre BALIBO Five ba dala 41 iha loron Dominggu, 16 Outubru 2016.

Objetivu husi Marsa ba Paz ne’e, atu hanoin hikas jornalista estranjeiru na’in 5 husi Australia, ne’ebé forsa militar Indonesia – Tentara Nasionál Indonesia (TNI) tiru mate sira iha Balibo, Munísipiu Bobonaro, 16 Outubro 1975, bainhira Indonezia hahú nia okupasaun iha Timor-Leste. Akontesimentu ne’e ohin-loron kuñesidu ho naran BALIBO FIVE KILLING.

Diretór Ezekutivu S-DESK, Julio Gil da Silva Guterres ba ANTIL, Sesta (14/10) iha Dili informa, Marsa ba Paz ne’e hahú husi Monumento Avenida Liberdade Imprensa ka fatin rotunda Merkadu Lama, Kaikoli, Dili to’o Monumento Sander Thoenes iha Igreja Bekora nia oin no remata ho kari ai-funan.

Tuir Gil da Silva, liuhusi Marca Ba Paz ne’e, jornalista sira  iha Timor-Leste fó omenajen, onra ba korajen no dedikasaun husi jornalista Australianu no Nova Zelandia na’in lima ne’ebé mate tanba misaun jornalizmu Iha fronteira Timor-Leste ho Indonezia.

“Ami halo ona karta lisensa ba Polisia Nasional Timor-Lorosa’e atu fó seguransa ba Marca Ba Paz ne’ebé sei partisipa husi jornalista Timor oan, besik na’in atus rua, hahú tuku 10.00 dader,” Gil hateten.

Iha intervista ne’e, eis jornalista timoroan ne’e hateten, komemorasaun ne’e sei konta mós ho palestra xavi husi jornalista seniór sira, ne’ebé identifikadu. (Jornalista: Otelio Ote/ Editor: Gantry Meilana)

Foto 1: Ekipa Desk, bainhira vizita monuemntu husi jornalista Sander Thoenes iha Igreja Bekora, Dili, tinan 2015. Jornalista ne'e mate iha akontesimentu violensia tinan 1999, hafoin refendu. – Foto 2: Estudante Jornalizmu Baziku iha Sentru DESK Dili. Foto Dok S-DESK