Market Inteligent Identifika Estranjeiru Balun Halo Imitasaun Ba Produtu Tais

DILI, (ANTIL – Servisu Market Inteligent indentifika ona ema estranjeiru balun halo imitasaun ba produtu lokál Timor-Leste (TL) nian hanesan karteira no pasta tais nomós  produtu seluk, Diretór Nasionál Regulasaun Komersiál, Ministériu Komérsiu, Indústri no Ambiente, Domingos Guterres  ba ANTIL, Sesta (7/10/) iha Bebora-Dili.

Domingos Guterres hatutan, produtu tais TL nian komesa copy paste ba ona produtu ida ne’ebé moderna liu, mas ida ne’e, agora daudaun identifika ona tanba, iha ekipa ida mak sei tun diretamente bá terrenu para halo fiskalizasaun no inspesaun loloos.

“Sé mak fó autorizasaun atu halo copy paste ba produtu Timor-Leste no hetan nia legalidade no lisensa husi ne’ebé, ami tenke haree no nia halo karik iha nasaun ne’ebé, agora daudaun ami identifika ona mas seidauk halo investigasaun ida kle’an no ami seidauk hatete husi nasaun ne’ebé mak halo ida ne’e”, Domingos hatutan.

Ekipa MKIA ho ministériu relevante sei tun para bele identifika didi’ak produtu ne’e no halo fiskalizasaun no inspesaun nomós investigasaun  ba asuntu ida ne’e.

Domingos afirma, produtu nia ezemplu pesoál sira rekolla tiha ona mas agora halo preparasaun ho ministériu relevante hodi tun karik ho informasaun ne’ebé iha.

“Kuandu emprezáriu ne’e mak estranjeiru, liuhusi knaar Ministériu Negósiu Estranjeiru, liuhusi diplomata no adidu sira ne’ebé estabelese hodi halo komunikasaun ho empreza ne’ebé iha país ne’ebé halo imitasaun hapara ona atividade ne’e. Sé la’e, Timor-Leste mós iha direitu atu halocomplain ba iha parte justisa nian tanba iha produtu lubuk ida mak sira halo ona transforma ita-nia motivu tais ne’ebé orijinál iha ne’e, sira hasai tiha foto depois haruka ba sira-nia rai no halodesign no lori fali mai fa’an iha ne’e”, Domingos relata.

Bainhira empreza sira halo copy paste ba produtu TL nian kuandu laiha autorizasaun ruma no lisensa husi ministériu kompetente mezmu kompañia ki’ik ka boot sei simu konsekuénsia ne’ebé todan no grave liu, kompañia tenke taka.

Regulamentu ne’ebé iha mak Dekretu Lei  Nú. 24/2011 kona-ba lisensiamentu katak ema ne’ebé hala’o negósiu iha TL tenke hetan lisensa no Dekretu Lei Nú. 12/2012 kona-ba estabelismentu SERVE nian. Kona-ba halo imitasaun ba produtu mak liga ba Dekretu Lei Nú. 23/2009 sobre inspesaun alimentár ekonómiku.

“Ida ne’ebé mak dehan nia habosok no halo falsifikasaun ba produtu ne’ebé iha entaun, sei hetan konsekuénsia ida ne’ebé boot hanesan hetan sansaun husi $1.000 até $20.000 no grave liu taka kompañia, ida ne’e mak baze legál ne’ebé iha”, Domingos subliña. (jornalista: Maria Auxiliadora; editora: Rita Almeida)

Foto: Produtu tais orijinál ne'ebé fa'an iha merkadu tais. Foto espesial