Governu selebra Loron Proklamasaun Independénsia nian

Iha loron-segunda oinmai, 28 Novembru, Timor-Leste selebra tinan 41 hosi Proklamasaun Independénsia nian.

Governu apoia hela eventu oioin iha nasaun tomak, tinan ne'e sentra iha Lospalos, iha Munisípiu Lautém. Iha tinan 1975, hafoin tinan 400 resin hetan kolonizasaun, testu hosi Proklamasaun Independénsia hosi Repúblika Demokrátiku Timor-Leste nian le hosi Prezidente Repúblika dahuluk, Francisco Xavier do Amaral.

Eventu komemorativu sira inklui Feira Nasional ida iha Lospalos, iha loron 25, 26 no 27 Novembru, organiza hosi Ministériu Komérsiu no Indústria, hodi "promove produtu lokal sira no hametin ekonomia nasional". Membru oioin hosi Governu daneen sei asisti atividade sira, ne'ebé inklui aprezentasaun kultural no muzikal sira, no konkursu soru tais, homan, artezanatu, kaer ikan no serbisu eskola sira nian.

Iha loron 27 no 28 Novembru, Komisaun Organizadora ba selebrasaun sira Proklamasaun Independénsia nian, lidera hosi Ministru Estadu, Kordenadór ba Asuntu sira Administrasaun Estadu no Justisa nian no Ministru Administrasaun Estatal, Dionísio Babo Soares, prepara ona programa ida ho parte tolu ne'ebé inklui Misa Agradesimentu iha loron 27 loraik no serimónia ofisial rua iha loron Proklamasaun Independénsia nian, iha kuartel F-FDTL nian iha Lospalos.

Iha loron 28 Novembru,tuku 08:00 dadeer, serimónia sira hahú ho hasa'e Bandeira Nasional. Tuir desfila militar, leitura ba testu Proklamasaun Independénsia nian, entrega Ordem de Timor-Leste hosi Prezidente Repúblika no anúnsiu ba ema sira ne'ebé manán “Prémio de nutrição”.

Aleinde Prezidente Repúblika, Taur Matan Ruak, serimónia sei hetan mós partisipasaun hosi Prezidente Parlamentu Nasional, Adérito Hugo da Costa, Primeiru-Ministru, Rui Maria de Araújo, ho Prezidente Tribunal Rekursu niN, Guilhermino da Silva. Selebrasaun ofisial sei hakotu ho hatún Bandeira Nasional.

Porta-vós hosi Governu, Ministru Estadu, Agio Pereira, reforsa katak "iha loron Proklamasaun ba ami nia independénsia, ami reflete kona-ba loron ida ne'ebé fó espresaun ba ami nia aspirasaun aas tebes ba liberdade no autodeterminasaun. Ami aproveita hodi fahe reflesaun kona-ba dalan hosi ami nia luta ba independénsia no ami afirma fali dalan ba ami nia dezenvolvimentu".

Fonte: Portal do Governo de Timor-Leste - em SAPO TL