KBRI REALIJA FEIRA EDUKASAUN

Kedutaan Besar Republik Indonesia (KBRI) iha Timor Leste (TL) realija feira edukasaun ho objetivu prepara no hasa’e koñesimentu estudante TL konaba kualidade husi Universidade hotu ne’ebé existe iha Indonesia liu-liu ba estudante TL ne’ebé maka remata ona estudu iha nivel Sekundariu no iha hanoin atu ba kontinua eskola iha Universidade Indonesia.

“Objektivu prinsipal husi feira edukasaun ne’e atu prepara no hasa’e koñesimentu estudante TL konaba kualidade no prosesu estudu iha Universidade hotu ne’ebé existe iha Indonesia liu-liu ba estudante TL ne’ebé maka remata ona estudu iha nivel Sekundariu ho nune’e wainhira iha estudante balun ke hakarak atu ba kontinua eskola iha Universidade Indonesia bele hatene no eskolla ona Universidade ne’ebé diak no kualidade ba sira rasik,”hateten Robert Hedy Soerjiayudha nudar atase pendidikan Republik Indonesia (RI) untuk Dili-TL, ba Jornalista sira hafoin partisipa iha feira Edukasaun, iha KBRI Mascarinhas-Dili, Segunda (14/11/2016).

Nia dehan, Universidade ne’ebé tuir feira Edukasaun ne’e maioria mai husi Universidade Indonesia inklui Universidade balun ne’ebé ejiste iha TL.

“Universidade ne’ebé tuir feira Edukasaun ne’e maioria mai husi Universidade Indonesia ho total 13 ne’ebé kompostu husi Universitas Islam Malang, Universitas Kristen Satya Wacana (UKSW) salatiga, Universitas Kristen Duta Wacana (UKDW) Yogyakarta, Unika Widya Mandira Kupang, Stikom Bali no seluk-seluktan no iha Universidade 7 husi TL nian ne’ebé kompostu husi Universidade Nasional Timor Lorosa’e (UNTL), Institute of Bussines (IOB), Universidade da Paz (UNPAZ), Universidade Oriental Timor Lorosa’e (UNITAL), Universidade de Dili (UNDIL), Dili Institute of Tecnology (DIT) no Canosa,”dehan Robert Hedy.

Iha fatin hanesan, Vise Ministru Edukasaun, Abel da Costa Ximenes hateten, inisiativa diak tebes husi KBRI ne’ebé maka realija ona feira edukasaun ne’e, tanba bele hasa’e koñesimentu husi estudante TL konaba situasaun no prosesu aprendisazen iha Indonesia e feira ne’e rasik involve mos Universidade TL.

“Ha’u hanoin inisiativa diak ida husi KBRI ne’ebé maka realija ona feira Edukasaun ne’e, tanba estudante TL presija koñese situasaun no informasaun balun konaba ensinu superior iha Indonesia hodi determina opsaun hakarak eskola iha Universidade TL ou Indonesia, maibe wainhira hakarak eskola iha Universidade Indoneia karun liu duke iha Timor no difikuldade bo’ot tebes, tanba tenki estuda bahasa Indonesia,”hateten Abel da Costa.

Reitor Universidade DIT, Manuel Vong akresenta liutan katak, feira refere hanesan mos sosialijasaun ida konaba lalaok no prosesu tomak husi kada Universidade.

“Feira ne’e hanesan mos sosialijasaun ida ba estudante ne’ebé remata ona estudu iha nivel Sekundariu molok hakat ba nivel Universitariu ho nune’e bele tulun sira hodi eskolla no hili Departementu (jurusan-red) inklui mos Universidade ne’ebé sira atu eskola ba,”tenik Manuel. Ita

Jornal Nacional