Utiliza Sasán Estadu Ba Partidu, KAK Sei Prosesu

DILI: Adjunto Komisáriu Komisaun Anti Korrupsaun (KAK), Manuel Bucar fó atensaun ba partidu polítiku sira atu labele utiliza sasán estadu ka governu, bainhira hala'o hela atividade partidu.

“Bainhira hetan, KAK sei prosesu tuir lei haruka,” Bucar afirma iha diskusaun kona-ba Prevensaun Korrupsaun ba Partidu Polítiku iha Kampaíña Eleitorál no Eleisaun Jerál 2017, iha Otel JL. Vila, Fatuhada, Kuarta (23/11).

Tensaun polítika iha 2017, tuir Bucar, sei sa'e maka'as. KAK sei haree tuir partidu polítiku ne'ebé mak utiliza sasan estadu. Tanba hahalok ne'e kontra lei. Ba KAK, ida ne'e konsidera krime.

“Ha'u hatete kedas, liuliu ba partidu polítiku sira ne'ebé iha asentu iha Parlamentu Nasionál. Sei karik uza sala sasan estadu nia, ba atividade partidu polítiku, automatikamente sei asume responsabiliza tuir lei,” dehan adjuntu Komisariu KAK ne'e. (*)

Frei Belo – Ola Timor -  Editór: Alexandre Assis

Foto: Adjunto Komisáriu KAK, Manuel Bucar fó atensaun ba Partidu Polítika atu labele utiliza sasán estadu bainhira hala'o atividade partidu. (Olatimornews Foto/Frei Belo)