Turkia kontraria Rúsia no hatete katak evakuasaun Alepo nian la hotu

Evakuasaun hosi bairu rebelde sira iha sidade síriu Alepo seidauk hotu, afirma ona iha loron-sesta ne'e hosi xefe diplomasia turku, Mevlut Cavusoglu, hodi la konkorda ho informasaun sira hosi ezérsitu rusu.

"Evakuasaun la hotu no ema barak sei hakarak atu sai", hatete hosi ministru turku iha konferénsia imprensa ida iha Ankara, tempu balun hafoin ezérsitu rusu fó sai katak operasaun sira ne'ebé sira halo hodi hasai rebelde ikus sira no sira nia família hosi Alepo hotu ona.

Deklarasaun sira hosi ministru turku mosu hafoin Rúsia fó sai tiha ona, liuhosi komunikadu ida hosi nia sentru militar iha Síria, katak hasai hotu ona feto ho labarik sira hosi leste Alepo nian no ezérsitu síriu "hamoos hela" ba dala ikus rebelde ikus sira hosi sidade.

Fonte militar síriu nain hatete ba ajénsia France Presse katak evakuasaun hetan "suspensaun maibé sei hotu ida".

Tuir ministru Negósiu Estranjeiru turku, "salva ona ema na'in 7.500". Tuir ezérsitu rusu katak hasai ona ema hamutuk 9.500 hosi Alepo, entre sira maka rebelde na'in 4.500 no ema na'in 337 ne'ebé kanek.

Observatóriu Síriu nian ba Direitu Ema sira nian kalkula katak hasai ona ema na'in 8.500, entre sira iha rebelde na'in 3.000 no "media" ofisial sira fó sai iha notísia katak hasai ona ema na'in 8.000.

"Balun hakarak hela iha Idleb (noroeste) no sira iha liberdade hodi halo. Maibé ami hakotu ona preparativu sira ba instalasaun kampu sira nian iha ami nia fronteira hodi tulun sira ne'ebé presiza", hatete hosi Cavusoglu.

Tuir Red Crescent Movement turku nian, organizasaun sira ne'ebé la'ós governu turku nian monta daudaun kampu ida ho tenda hamutuk 10.000 ba ema deslokadu sira hosi provínsia Alepo, besik iha fronteira ho Turkia.

Turkia simu ona ema na'in 50 resin ne'ebé kanek todan, haktuir hosi Red Crescent Movement turku nian. "Ami nia ministru Saúde ativu hela hodi fó ajuda ba sira", hatete hosi ministru turku.

Evakuasaun hosi Alepo halo parte iha akordu ida sesarfogu nian ne'ebé negosiadu entre Rúsia ho Turkia no ne'ebé hahú halo iha loron-kinta, hafoin tentativa dahuluk iha loron-kuarta ne'ebé laiha susesu.

Iha evakuasaun loron-sesta nian hetan suspensaun hosi forsa síriu sira ne'ebé akuza opozisaun hodi la respeita termu sira akordu nian.

Tuir fonte militar síriu, interupsaun desidi tiha hafoin ema armadu sira tiru hodi tenta halai ho refén sira, ka, militar síriu sira ka kombatente sira hosi milísia sira pró-rejimi nian.

Tuir reprezentante ONU nian ba Síria, Staffan de Mistura, katak ema na'in 50.000 resin sei iha Alepo leste.

SAPO TL ho Lusa - Foto@ Ghith Sy/EPA