Bangladexe insisti ONU hodi halo asaun hasoru violénsia iha Birmánia

Embaixador Bangladexe nian iha ONU hatudu, iha loron-kinta, kontinuasaun hosi violénsia iha estadu birmanés Rakhine, la hanesan ho afirmasaun ne'ebé halo hosi autoridade sira Birmánia nian.

Masud Bin Momen afirma ona, iha reuniaun aberta ida hosi Konsellu Seguransa ONU nian, katak Bangladexe simu ona membru rihun 900 hosi "minoria ne'ebé hetan liu perseguisaun iha mundu", rohingya sira.

Ema rohinhya rihun ruanulu to'o ona iha loron-kuarta kalan iha Bangladexe, nasaun ne'ebé simu ona ema rihun 500 resin dezde loron 25 Agostu.

Diplomata klasifika ona situasaun hanesan sustentável no repete fali pedidu ba ONU atu kria "zona seguru sira" ba ema sira ne'e iha Birmánia nia laran.

Masud Bin Momen relata ona katak refujiadu sira iha nia nasaun fó sai katak violénsia sira uza hodi halo família sira hakfodak no halo sira husik Birmánia, no iha sasin sira hosi vila sira ne'ebé hetan sunu no ema sira ne'ebé hetan asalta no ema baku.

"Violénsia sira ne'e hatudu katak Governu Birmánia nian uza inséndiu hodi halo mamuk norte Rakhine nian", nia hatete.

Kalkula katak ema rohingya sira - minoria étnika ne'ebé la rekoñesidu hosi autoridade birmanés sira - ne'ebé besik millaun ida resin, iha entre ema 10.000 no 20.000 hosi etnia ne'e maka hamlaha, kolen no dalabarak kanek, ne'ebé maka loron-loron atravesa ba fronteira Bangladexe nian, nasaun ida ne'ebé kiak liu iha mundu.

Hasoru emigrasaun boot ne'ebé to'o ona númeru simbóliku hamutuk refujiadu millaun balun ne'ebé maka to'o iha Bangladexe dezde 25 Agostu, ONU ko'alia ona katak ne'e hanesan "limpeza étnika", no Konsellu Seguransa eziji ona, iha loron 13 Setembru, ba Birmánia medida "urjente" sira hodi hapara "violénsia maka'as" iha estadu Rakhine.

Iha sira nia relatu, refujiadu sira ko'alia kona-ba masakre sira, sunu aldeia sira, tortura sira no violasaun koletivu.

Violénsia ho diskriminasaun hasoru ema rohingya sira aumenta iha tinan hirak ikus ne'e: trata sira hanesan ema estranjeiru iha Birmánia, nasaun ne'ebé maioria hanesan ema budista, etnia ne'e hanesan komunidade boot iha mundu ne'ebé maka laiha nasionalidade.

Dezde hasai hosi sira nasionalidade birmaneza iha tinan 1982, sira hetan beibeik bandu: labele halo viajen ka kaben lahó autorizasaun, laiha asesu ba merkadu serbisu nian no mós ba serbisu públiku sira (eskola sira ho hospital sira).

SAPO TL ho Lusa