Junta militar tailandeza afirma katak eis-primeira-ministra halai ba Dubai

Eis-primeira-ministra tailandeza Yingluck Shinawatra, kondenadu iha loron-kuarta ba kadeia tinan lima, halai ona ba Dubai, afirma iha loron-kinta ne'e hosi xefe junta militar nasaun nian, hodi hatete katak fó sai ona mandadu foun hodi kaer.

Yingluck Shinawatra, hahú hosi loron 25 Agostu, maka la mosu iha públiku bainhira tenki aprezenta iha tribunal hodi rona rezultadu hosi prosesu tanba neglijénsia, hanesan nia akuzasaun tanba la superviziona planu apoiu ba foos, ne'ebé, tuir komisaun antikorupsaun, hamosu prejuízu ho folin hanesan euro millaun 17,1 no hamosu korupsaun.

"Tuir informasaun sira hosi Ministériu Negósiu Estranjeiru, nia agora iha Dubai", Prayut Chan-o-Cha hatete.

Fonte oioin ne'ebé besik ba Yingluck no hosi junta militar sira hatete ona katak eis-xefe governu tailandés nian agora iha Dubai, ne'ebé fatin nia maun Thaksin hela ba, ne'ebé hanesan mós eis-primeiru-ministru ne'ebé halai mós hosi akuzasaun judisial sira.

Yongluck, ne'ebé hasoru kastigu máximu ba kadeia tinan sanulu, mantén nia inosénsia dezde inísiu julgamentu nian no hatete katak akuzasaun iha motivu polítiku no iha relasaun ho junta militar ne'ebé governa Tailándia hahú 2014.

Eis-primeira-ministra halai hosi nasaun hafoin audiénsia ne'ebé programa ba loron 23 Agostu, ne'ebé Supremu hanoin atu fó sai kastigu, ne'ebé adia tiha ona ba loron-kuarta tanba nia la marka prezensa.

Eis-xefe governu tuun hosi governu hafoin desizaun polémika ida hosi Tribunal Konstitusional, ne'ebé maka akuza nia halo abuzu poder tanba influénsia libertasaun hosi funsionáriu importante ida iha loron balun antes ezérsitu kaer poder, iha golpe loron 22 Maiu 2014.

Yongluck kaer governu iha 2011, hafoin manán maioria absoluta ho Pheu Thai, partidu ida ne'ebé harii hosi Thaksin, ne'ebé tuun mós tanba golpe estadu ida iha tinan 2006 no kondenadu iha tinan 2008, ho rebeldia, ba kadeia tinan rua tanba abuzu poder nian.

SAPO TL ho Lusa