Papa "triste tebes" ho tiruteiu iha Las Vegas

Iha loron-segunda ne'e papa Francisco deklara katak nia senti "triste tebes" ho tiruteiu iha Las Vegas, iha Estadus Unidus, ne'ebé halo pelumenus ema na'in 58 mate no na'in 400 kanek, hodi hatete katak hanesan "trajédia ida lahó sentidu". 

"Triste tebes bainhira hatene kona-ba notísia tiruteiu iha Las Vegas, papa Francisco hatudu nia proximidade espiritual ho ema sira ne'ebé afetadu ho trajédia ne'ebé lahó sentidu ne'e", Vatikanu hatete liuhosi nota ida.

"Nia felisita esforsu sira polísia nian no ema sira hosi serbisu emerjénsia nian no promete reza ba ema sira ne'ebé kanek no ba ema sira ne'ebé mate ona", haktuir hosi testu ne'ebé asina hosi "númeru daruak" Santa Sé nian, kardeal Pietro Parolin.

Atirador ida dispara, iha loron-domingu kalan, iha Las Vegas hasoru multidaun ida ne'ebé asisti hela konsertu ár livre, oho pelumenus ema na'in 58 nune'e sai hanesan tiruteiu ida ne'ebé aat liu iha Estadus Unidus iha dékada hirak nia laran.

Pelumenus ema na'in 200 resin kanek.

SAPO TL ho Lusa