Assanami: Ukun Nee Povu Nian

DILI – Prezidente Partidu Demokratiku Mariano Asanami Sabino hateten, ukun nee povu nian, wainhira kuandu lideransa sira impresta ukun nee atu servisu, maibe kuandu halo ladiak fo fila fali ukun nee ba povu ida nee hodi deside.

“Partidu Demokratiku nee mai kedan ninia naran nee demos ho kratia katak demos nee povu,kratia nee ukun, ukun nee povu nian entaun wainhira kuandu lideransa sira impresta ukun nee atu serviu, maibe kuandu ita halo ladiak ita fo fila fali ukun nee ba povu ida nee para povu asumi ninia sidadania, ninia direitu tomak nia nain ba ukun atu determina fila fali ba iha votasaun,” dehan Prezidente PD Assanami ba STL, iha Palasiu PR, Bairo-Pite, Dili, Sesta (26/01/2018).

Nia dehan, desizaun Prezidente Republika nee laos halo ema kontenti, maibe laiha dalan tenke fo fila fali ba povu, para povu bele determina fila fali. Tanba nee preparasaun PD minimu, situasaun defisil, orsamentu laiha, maibe se desizaun maka ida nee ona, tanba laiha tan desizaun seluk.

Iha fatin hanesan Vise Prezidente partidu Fretilin Francisco Miranda Branco hateten Koligasaun sei lao nafatin ba oin, idak-idak sei servisu karik iha tempu oin determina koligasaun nee hamutuk ka ketak, ikus mai sei determina. 

Carme Ximenes | Suara Timor Lorosae