Edukasaun Nudar Ferramenta Indispensavel iha Transformasaun Sivika

Roger Rafael Soares * | opinião

Indiskutivel tebes wainhira afirma katak edukasaun nudar instrumentu poderozu ba formasaun humana, tambá nia dezempeña, ho klareza boot, papel ne´ebé bazilar ho importansia extrema iha dezenvolvimentu ba konsiensia sivika. Dezenvolvimentu ba konsiensia sivika signifika akijisaun husi konsiensia ida ne´ebé luan kona-ba responsabilidade sosiál no polítika, ne´ebé envolve mos elementus hanesan, razaun, autrokrítika no kompromisu polítiku ne´ebé reverte iha afirmasaun husi espíritu no sentidu demokratikus.

Iha sosiedade demokratika ida, hanesan ita nian, mudansa sosiál sempre posivel, desde que ita exerse iha ita nia knar loro-loron, konvivensia sosiál no komunitaria ne´ebé bazia ba valores morais no etikas, respeitu no toleransia, ne´ebé koliga ho vontade no determinasaun atu konkretiza  kontaktu ne´ebé harmoniozu no saudavel.

Atu fundamenta katak, ita presiza hare ba edukasaun iha sentidu ne´ebé luan, tambá propozitu husi edukasaun implika mos, edukasaun sivika, edukasaun ba sidadania, edukasaun ba direitus no deveres husi sidadania, no liu husi nia maka, ita realiza ita nia konvivensia pasifika no harmonioza iha sosiadade no iha Nasaun. Iha ambitu ida ne´e, eskola asume papel ida fulkral tebes no nia atua ho prinsipal misaun atu forma induvidu iha koñesimentu inerrante hodi sai sidadaun lolos, no prepara inklusivu sidadauns iha dezenvolvimentu no evolusaun sivika iha momentu prezente no mos iha futuru.

Sidadania no edukasaun vinkula direitamente, laos deit tambá edukasaun okore a partir husi direitu ne´ebé induvidu konkista, maibe tambá nia dezempeña papel ida ne´ebé relevante iha sosiedade, liu husi ne´ebé, bele prepara sidadaun ne´ebé kapaz no aptu atu konvive no atua kritikamente nudar sidadaun.

Importante tebes atu subliña katak la iha deveres sein direitus no laiha direitus sein responsabilidades, no so bele promove dezenvolvimentu sosiál, polítiku no ekonomiku, iha rai ida, liu husi espiritu ne´ebé nakonu ho envolvimentu,  ho partisipasaun ativa, ho seriedade no responsabilidade husi sidadaun ida idak iha prosesu dezenvolvimentu nasional, katak, importante no nesesariu tebes involvimentu ida ho responsabilidade sosiál, ne´ebe só konkretiza liu husi reforsu no investe seriu iha edukasaun.

Nune´e, edukasaun nudar ferramenta indispensavel iha transformasaun sosiál, enkuantu nia kontribui estimula sentidu husi sidadania, hodi envolve importansia husi formasaun etika no formasaun sivika, iha ne´ebé abrange komportamentus sivikus no valor moral, ne´ebé rekere manifestasaun husi atus responsáveis. Iha otika ida ne´e, importante atu reforsa katak, investimentu no esforsu inkansavel ne´ebé dezenvolvidu husi governu, hahu husi IV Governu Konstitusional, lideradu husi Xanana Gusmão, mediante  konstituisaun ba Fundu Dezenvolvimentu Kapital Humano ( FDCH) no mos esforsu husi instituisoens publikas no privadas no família sira, iha investimentu ba formasaun iha Rekursus Humanus, liu husi, haruka estudantes ba estuda iha rai liur hodi eleva sira nia kompetensia no koñesimentu, hakarak iha nível sientifiku no  mos pessoal, nudar konkretizasaun pratika hodi promove formasaun konsiensia no formasaun karakter husi sidadaun timoroan.

Edukasaun no formasaun karakter presiza trata nudar kestaun vanguarda iha prosesu dezenvolvimentu nasional, tamba nia permite atu dezenvolve no disimina sidadania, liu husi ne´ebé, sidadauns rekonhese  sira nia direitu no dever nudar sidadaun, direitu no dever iha partisipasaun demokratika ativa, hodi kontribui ba promosaun paz, estabilidade no dezenvolvimentu nasional.

Tamba ne´e maka, mais duke nunka, importante no fundamental tebes atu rekoñese importansia husi edukasaun nudar meiu transmisaun valor siviku no valor sidadania ba jerasaun aktual no ba jerasaun futura, no iha kontestu ida ne´e, maka presiza ho preokupasaun boot investimentu ida ne´ebe seriu liu tan, klean liu tan, responsavel no fokadu liu tan iha setor edukasaun iha ita nia rain.

*Rojer Soares, Ailili, Manatuto | rrtsoares@hotmail.com