Rai Kilat Ilegal no Kilat Ilegal

Problema ho kilat iha Timor-Leste nafatin fanun ita hotu nia atensaun desde Krize 2006. Liu-liu kilat sira ne’ebé lakon durante Krize 2006 no kilat ilegal sira. Iha ona esforsu lubuk ida hodi rekolla no investigasaun ba kilat sira ne’ebé lakon durante krize. Maibe kilat balu husi Polísia Nasional Timor-Leste (PNTL) nian seidauk rekolla hotu.

Iha tempu hanesan kilat sira ne’ebé lakon seidauk rekopera fila-fali, informasaun oin-oin hato’o husi ulun boot sira institusaun seguransa nian hato’o katak kilat ilegal husi Atambua-Indonézia tama ona iha Timor-Leste liu husi fronteira no espalla ona iha rai laran.

Aleinde kilat sira ne’ebé lakon no kilat ilegal sira, kilat sira ne’ebé husi institusaun seguransa nian sai nafatin preokupasaun husi públiku tomak. Liu-liu kilat husi institusaun PNTL no FALINTIL-Força de Defesa Timor-Leste (F-FDTL) nia jestaun no utilizasaun. Iha ne’ebé kilat balu husi institusaun rua ne’e nian espalla iha media sosial monu ba ema sivil no labarik sira nia liman hanesan sasan halimar. Mesmu ne’e hanesan istilu ida husi ema ho kilat maibe fo mensajen katak kilat husi institusaun rua ne’e nia seidauk iha jestaun ba kilat ho diak. FM preokupa mos oinsa bele asesu ba kilat? Karik ne’e hanesan sasan halimar nian?

Portantu efeitu husi kilat iha Timor-Leste iha tinan hirak ikus ne’e rezulta ona ema mate, kanek, ameasa, estragus no hasoru animal protejidu sira. Kilat balu identifikadu husi membru PNTL no F-FDTL no barak liu maka la identifikadu kilat sira ne’e mai husi ne’ebé? Karik husi kilat ilegal sira ka kilat sira ne’ebé lakon durante krize nian?

Atu hetan informasaun kle’an liu kona-bá asuntu ne’e haree iha kraik ne’e:

( PRESS RELEASE HANEHAN IHA NE’E)

( RELATORIU KOMPLETU HANEHAN IHA NE’E)

Nélson Belo
Diretor Ezekutivu
Email: direktor.mahein@gmail.com
Telemovel: (+670) 78316075 ka 77561184
Website: www.fundasaunmahein.org