Fulan Ne’e DOT Hamutuk Millaun U$105.4

DILI, (TATOLI) – Ministériu Planu no Finansas (MPF) distribui ona Dotasaun Orsamentu Temporáriu (DOT) ka duodesimál abríl 2018 ba liña ministeriál sira ne’ebé mak iha totál DOT fulan ne’e sa’e porsentu ida husi totál DOT hamutuk millaun U$105.4 ne’ebé kompara ho duodésimu marsu nian hamutuk $104.631.399 ka pursentu 99 husi tetu DOT ne’ebé signifika poupa deit $1,445,658 ka pursentu ida husi tetu DOT.

Tuir komunikadu ne’ebé TATOLI asesu ohin iha portál MPF nian katak kresimentu ne’e relasiona ho kontinuasaun prevee despeza ba atividade eleisaun ne’ebe através prosesu aprovizionamentu, servisu legál sira no eis titulár sira, RAEOA-ZEESM no infraestrutura rurál inklui aumentu ba kustu kontribuisaun finanseira internasionál.

“Durante implementasaun programa no atividade iha DOT hirak liubá, sempre la’o di’ak no hetan apresiasaun másimu husi superiór sira. Hein katak, iha fulan-abríl ne’e bele hatudu tan dezempeñu di’ak liu husi períodu sira seluk liuliu realiza atividade eleisaun iha fulan-maiu”, katak komunikadu ne’e.

Iha alokasaun DOT durante períodu janeiru to’o marsu seidauk liu tetu DOT inklui abríl nian, maski iha kresimentu husi períodu ida ba períodu seluk, maibé nafatin kumpri ba desizaun Konsellu Ministru limita de’it ba kategoria haat mak hanesan saláriu no vensimentu, bens no servisu, kapitál dezenvolvimentu no transferénsia públika.

Nune’e MPF husu nafatin atu liña ministeriál, instituisaun Estadu no Ajénsia Autónoma sira presiza kumpri nafatin prinsípiu sira ne’ebé hatuur ona ba implementasaun DOT tuirmai mak hanesan dotasaun orsamentál kobre de’it despeza ida durante períodu la liu fulan ida no dotasaun orsamentál labele liu um doze avos (1/12) husi orsamentál ne’ebé defini tiha ona tuir lei Orsamentál Jerál Estadu númeru 13/2016 ne’ebé mak tama em vigor, haktuir husi artigu 31 husi Lei Orsamentu no Jestaun Finanseira númeru 13/2009.

Sobre progresu ezekusaun DOT fevereiru 2018 konsege atinji porsentu 60.2 husi totál orsamentu hamutuk millaun 102.952.940 (ne’e esklui empréstimu). Kompozisaun kona-ba ezekusaun DOT fulan Fevereiro 2018 mak hanesan saláriu no vensimentu porsentu 88.1, bens no servisu porsentu 39.5 kapitál dezenvolvimentu porsentu 55.3, transferénsia públika porsentu 63.6 no despeza kontijénsia porsentu 76.1.

Turimai ezekusaun duodésimu janeiru 2018 atinji porsentu 66 husi totál orsamentu hamutuk millaun 101.168.285. Kompozisaun kona-ba ezekusaun DOT janeiru 2018 mak hanesan saláriu no vensimentu porsentu 83.5, bens no servisu porsentu 44.9 kapit’al dezenvolvimentu porsentu 64.3, transferénsia públika porsentu 85.3 no despeza kontijénsia porsentu 96.6.

Jornalista: Maria Auxiliadora

Foto/MPF