DILI, (TATOLI) – Prezidente
Tribunál Rekursu (PTR), Deolindo do Santos, fó votu susesu ba partidu polítiku
(ParPol) hafoin orgaun judisiál halo sorteiru ba lista partidu ualu ne’ebé
definitivu konkore iha eleisaun antesipada 12 maiu 2018.
“Ohin dada sorteiu termina,
susesu ba partidu polítiku (ParPol) sira iha kampaña eleitorál to’o eleisaun,
susesu dame nia laran”, hato’o iha TR, ohin.
Hosi rezultadu sorteiu, Partidu
Esperansa Pátria (PEP) mak iha númeru dahuluk, Partidu Demokrátiku (PD) iha
númeru daruak, Partidu Repúblikanu (PR) iha númeru datolu, Frente
Revolusionária Timor-Leste Independente (FRETILIN) iha númeru da-haat,
Movimentu Sosiál Demokrata (MSD) iha númeru da-lima, Movimentu Dezenvolvimentu
Nasionál (MDN) iha númeru da-neen, Frente Dezenvolvimentu Demokrátiku (FDD) iha
númeru da-hitu no Aliansa Mudansa ba Progresu (AMP) iha númeru da-ualu.
Partidu hirak ne’e sei koloka iha
buletim votu tuir sekuénsia númeru sorteiu eh buletim votu sei organiza tuir
númeru ordem.
Nune’e, antes atu haruka ba
Sekretariadu Tékniku Administrasaun Eleitorál (STAE) nia husu ParPol hirak
ne’ebé definitivu atu konfirma kuandu naran, sigla ruma sei iha erru tanba
kuandu imprensaun iha buletim votu ita sei labele halo mudansa.
Iha fatin hanesan, Diretór STAE,
Acilino Manuel Branco, akresenta hafoin sorteiru TR sei haruka númeru ordem
ParPol sira atu konkore iha eleisaun antesipada ba orgaun eleitorál atu bele
ajusta modelu buletim.
Enkuantu, Acilino Branco husu ba
partidu hotu atu aprezenta modelu sigla, naran no seluk tan atu ajusta ba
modelu buletim votu hafoin sira halo apresiasaun.
“Ita kontaktu ona partidu
polítiku atu aprezenta sira nia naran partidu, sigla ne’ebé balun sei hetan
erru, nune’e bele hadi’a”, katak.
Hafoin STAE sei lori ba Komisaun
Nasionál ba Eleisaun (CNE-sigla portugés) atu halo akreditasaun ba modelu
buletim votu depois ba halo imprensaun iha gráfika nasionál.
Iha 3 abril sei termina prosesu
imprensaun hafoin entrega fali ba STAE atu bele halo distribuisaun ba rai laran
no rai liur (diáspora).
Jornalista: Zezito Silva | Editora:
Rita Almeida
Imajen: Prezidente Tribunál
Rekursu, Deolindo dos Santos, bainhira fó sai númeru sorteiu partidu polítiku
ne'ebé sei konkore iha eleisaun antesipada iha Kaikoli, ohin. Foto Tatoli/Egas
Cristovão
Sem comentários:
Enviar um comentário