DILI, (TATOLI) – Magnífiku
Reitór Universidade Orientál Timor Leste (UNITAL), Florindo Pereira, informa 31
dezembru iha fulan ikus ne’e, universidade sei realiza graduasaun ba estudante
hamutuk 915 iha kampus universidade, Bekora.
“UNITAL iha ona programa fixu atu
realiza programa graduasaun iha 31 dezembru 2018, tanba ami hasoru ona Ministru
Ensinu Superiór iha Ministériu Edukasaun, no deside ona iha fulan ikus ne’e”,
Reitór ba TATOLI iha servisu fatin, ohin.
Graduasaun ne’e sei akontese ba
estudante sira hosi fakuldade ualu, no serimónia ne’e sei realiza dader ho
abertura misa iha kampus UNITAL Bekora.
Nia dehan programa graduasaun,
komisaun sira halo preparasaun di’ak ona, maibé problema maka distribuisaun
karta konvite maka tarde, tanba foin maka iha informasaun hosi Ministériu
Edukasaun bainhira ba hasoru Ministru Ensinu Superiór, enkuantu karta konvite
sei fahe aban mezmu iha loron boot, sé mak la mai no mai, depende ba ema
ida-idak, importante graduasaun la’o. Tanba estudante sira ne’e balun kleur ona
durante tinan hitu.
Estudante finalista sira nia
naran Ministériu Edukasaun aban termina ona verifikasaun finál no sei publika
iha jornál repúblika, katak tan.
Klaru katak universidade loloos
iha planu anuál ka kalendáriu akadémiku tinan ida nian tomak. “Maibé ha’u mós
foin mai asume pasta reitór iha fulan ida liu ba, ha’u husu universidade dehan
seidauk iha kalendáriu akadémika dezde uluk kedan”.
Maibé tinan oin, hakarak ka
lakohi tenke iha ona kalendáriu akadémiku, atu atividade saida de’it
universidade nian tenke tau iha planu, agora ami sei la’o tuir saida maka iha,
afirma.
Entretantu, problema universidade
nian kona-ba pagamentu ba dosente sira iha tempu reitór anteriór nian, agora
dadaun rezolve ona ho porsentu 70 ka selu dadaun ona, karik iha fulan janeiru
ho fevereiru bele rezolvidu ba pagamentu dosente nian, no prosesu aprendijazen
la’o normál.
Jornalista: Zezito Silva | Editora:
Rita Almeida
Sem comentários:
Enviar um comentário