FFKJODB Husu Aselera Lei Kódigu Labarik no Lei Protesaun Labarik

DILI, (TATOLI) - Fundasaun Forum Komunikasaun Juventude Oratóriu Don Bosco (FFKJODB), hala’o inkontru ho Prezidente Repúblika, Francisco Guterres Lú Olo, hodi husu Xefe Estadu ko’alia ho Governu atu aselera Lei Kódigu Labarik no Lei Protesaun Labarik.

“Ohin ami hetan oportunidade mai hasoru Prezidente Repúblika atu hato’o ami nia serbisu nomós problema ne’ebé maka ami infrenta. Ami husu tulun ba Prezidente Repúblika oinsá atu fó hanoin ba Governu atu aselera lalais Lei Kódigu Labarik no Lei Protesaun Labarik,” Prezidente FFKJODB, Cipriano Oliveira ba jornalista sira iha Palásiu Prezidente Nicolau Lobato, Bairru Pité, segunda ne’e.

Nia dehan, lei rua ne’ebé seidauk aprovadu ne’e difikulta sira oinsá atu rezolve kazu labarik hanesan kazu violénsia sexuál, insestu, exploitasaun no violénsia fíziku.

Nia haktuir katak labarik hamutuk 122 maka tama iha Uma Mahon ne’ebé jere hosi FFKJODB no entre 122 ne’e, balun renefika ona no balun iha hela prosesu justisa.

“Serbisu ne’ebé durante ne’e ami halo ajuda labarik sira atu bele identifika sira nia problema. Ba labarik sira ne’ebé hetan risku ami tau iha ami nia Uma Mahon no sira ne’ebé iha problema ho família ami buka atu halo aprosimasaun ho família, sira ne’ebé kontra lei ami serbisu hamutuk ho Ministériu Públiku no ONG sira ne’ebé serbisu ba labarik hamutuk atu buka dalan legál ninian atu bele rezolve problema,” nia esplika.

Cipriano informa, bainhira Prezidente Repúblika halo soru-mutu ho Primeiru-Ministru sei hato’o ba Primeiru-Ministru oinsá atu haree fila fali lei rua ne’ebé seidauk aprovadu no Prezidente Repúblika prontu atu koopera iha asuntu ida ne’e.

Forum ne’e hala’o serbisu tau-matan ba labarik sira ne’ebé maka abandona iha dalan no labarik sira ne’ebé maka hetan violénsia doméstika.

Jornalista: Xisto Freitas | Editór: Manuel Pinto