Izensaun Taxa Aplika Mós ba Parseiru Bilaterál Hotu

DILI, (TATOLI) - Diretór Jerál Asuntu Bilaterál, Ministériu Negósiu Estranjeiru no Kooperasaun (MNEK), Isílio Coelho informa katak izensaun  taxa aplika la’ós de’it ba Japaun maibé mós ba parseiru bilaterál sira seluk. Importante mak iha akordu kuadru.

“Ha’u sente presiza atu haree, mas em princípio, ha’u sente sim tanba se ita halo ona ita-nia parseiru bilaterál ida, entaun naturalmente bele halo mós ba parseiru bilaterál sira hotu tanba kooperasaun hotu,” informa Diretór Isílio Coelho, ohin loro kraik ne’e ba Ajénsia TATOLI, iha edifísiu MNEK, Praia dos Coqueiros, Díli.

Diretór ne’e haktuir, Timor-Leste iha ona akordu bilaterál ho nasaun barak. Primeiru iha akordu ne’ebé ita bolu akordu kuadru ka framing work agreement technical cooperation,ida ne’e mak hanesan akordu inan iha nivel bilaterál.

Depois, akordu inan ne’e mak bele asina fali memorandu, protokolu, troka nota, hodi implementa fali buat ne’ebé konkorda tiha ona.

“Ita iha relasaun bilateral ho cento e tal países maibé país oi tuan hela mak ita iha akordu kuadru ida ne’e. Ita iha ho Japaun, Estadu Unidu Amérika (EUA), Xina, Portugal ho Alemaña i entre outro,” hateten Diretór, Isílio Coelho.

Diretór ne’e akresenta, ho EUA, iha akordu kuadru ne’e prevee tiha ona kona-ba jestaun impostu ba ita-nia kooperasaun. Alemaña mós asina tiha ona, iha ne’ebá mós prevee tiha ona jestaun impostu.

“Agora ho Japaun ita asina akordu kuadru ne’e iha 2005 só que akordu ne’e implika ratifikasaun husi Parlamentu. Até agora, ita seidauk hetan ratifikasaun husi Parlamentu, entaun buat ne’ebé ita halo até agora ne’e, bazea ba prazu akordu kuadru, tinan-tinan ita asina akordu ne’e, ita bolu troka nota ka exchange note,” esplika diretór.

“Iha ne’e mak ita haree jestaun impostu ne’e hanusa. Jeralmente sira finansia projetu,” nia reforsa tan.

Diretór Jerál Asuntu Bilaterál, Isílio Coelho mós konfirma no rekoñese katak antes ne’e, iha instituisaun governu balun asina akordu ho nasaun balun la follow up (kontinua). “Loos duni iha fallansu oituan iha téknika nomós administrativa, entaun iha memorandu balun mak asina sein prosesu ne’ebé prevé,” rekoñese diretór ne’e.

“Maibé depois 2010, ita tenta kuriji. Ne’ebé, neste momentu ha’u sente buat balun di’ak, i haree fila fali ba Ministériu Negósiu Estranjeiru nian hato’o kompeténsia para koordena,” nia hatutan.

Diretór Jerál Asuntu Bilaterál, Isílio Coelho informa tan katak MNEK tenta koordena hela, atu keta falla.

“Iha prosesu barak, entaun de vez em quando balun la iha koñesimentu, karik halo kontaktu fora husi ami, entaun ami la konsege monitoriza hotu. Parte husi dezenvolvimentu, uluk mak laduun di’ak, agora di’ak ona. Espera sei di’ak liután”.

Nia esplika, Timor-Leste iha lei ida, lei sobre tratadu internasionál no prevé semak halo negosiasaun kona-ba akordu ne’e, ne’ebé deskreve katak. Ministériu Defeza (MD) ho Prezidénsia Repúblika bele halo negosiasaun.

“Seluk ne’e, Ministériu Negósiu Estranjeiru mak negósia, bele mós Konsellu-Ministru delega fila fali ba Ministériu sira seluk,” dehan Diretór Jerál Asuntu Bilaterál, Isílio Coelho.

Notísia relevante:  http://www.tatoli.tl/2019/01/timor-leste-sei-aplika-izensaun -taxa-ba-japaun/?fbclid=IwAR3TFbSxnCYqnGOPhXe7OrkFzJW2WqrHn1MXDwvEqpBaVuCzN6Waen-hgLI

http://www.tatoli.tl/2019/01/membru-governu-asina-akordu-tanba-hetan-atribuisaun-hosi-kmgovernasaun-anterior-sira-asina-akordu-maibe-la-follow/?fbclid=IwAR0h073Bw9JUktAWDnklopcSNt1QyGLixSGNDWHaZk5N7nF7LEb5XqahIhk

Jornalista: Rafy Belo | Editór: Manuel Pinto

Imajen: Diretór Jerál Asuntu Bilaterál, MNEK, Isílio Coelho. Foto: Egas Cristovão