DILI, (TATOLI) – Premiadu
Nobel Dame, José Ramos Horta, tau konfiansa ba Prezidente Repúblika (PR),
Francisco Guterres Lú Olo, sei solusiona situasaun polítika rai-laran.
“Ha’u hasoru malu ho
Primeiru-Ministru ko’alia kona-ba situasaun bele rezolve, nune’e fó apelu ba
Prezidente Repúblika atu promulga orsamentu iha tempu badak”, Horta ba
jornalista sira hafoin hasoru malu ho Xefe Governu, Taur Matan Ruak, iha
Palásiu Governu, ohin.
Horta akresenta Xefe Estadu
hanesan ema ida di’ak, iha prinsípiu, iha nia fuan tanba nia mai hosi luta, mai
hosi povu kiik.
“Dalaruma ita tenke hateten
nune’e; ha’u iha prinsípiu maibé mós ha’u polítiku, ha’u tenke buka dalan hodi
hetan solusaun, hatudu fleksibilidade no tenke tuir konstituisaun ho lei
haruka”.
Tanba ne’e, nia dehan Prezidente
Repúblika nia papél ida mak polítiku atu buka solusaun ba problema, relasiona
ho Orsamentu Jerál Estadu 2019, nia bele promulga iha tempu badak atu ita fó
apoiu ba governu, programa bele ezekuta liliu projetu tasi mane bele realiza
duni.
Horta louva Xefe Governu tanba
maske OJE 2019 seidauk promulga maibé administrasaun bele la’o di’ak,
governasaun la’o normál no seluk tan.
Entretantu, Horta haktuir
enkontru ho eis Xefe Governu, Mari Alkatiri ba PM, katak nia (Marii) mós
hakarak governu ne’e bele realiza nia programa, no nia mós hakarak rai ne’e atu
la’o ba oin.
Alende orsamentu, Ramos Horta mós
sujere ba PR atu fó pose ba kandidatu membru governu ne’ebé pendente.
Horta argumenta ho razaun mak
garante ezekusaun orsamentál, presiza membru governu hodi foti desizaun.
Horta afirma: “Ha’u la iha
partidu polítiku, ha’u respeita sira hotu hanesan Xefe Estadu, Lú Olo, Xanana
Gusmão, Primeiru Ministru, Taur Matan Ruak, Mari Alkatiri, sira iha matenek,
iha integridade, responsabilidade ba povu atu tuur hamutuk ko’alia maibé
ida-idak tenke haree oinsá bele ho fleksibilidade atu diálogu bele la’o
ba oin”.
Jornalista: Zezito Silva | Editora:
Rita Almeida
Imajen: Premiadu Nobel Dame 1996,
José Manuel Ramos Horta, sorumutu kortezia ho Primeiru-Ministru, Taur Matan
Ruak, iha Palásiu Governu, ohin. Imajen António Goncalves
Sem comentários:
Enviar um comentário