ADVOGADO JOSE AMEASA LORI MJ HO SETP BA TRIBUNAL

DÍLI - Advogadu privadu José Guterres ameasa sei lori Ministru Justisa (MJ) ho Sekretariu Estadu Terras Propriedade Ba Tribunál, tanba la resposta rekursu reklamasaun ne’ebé hato’o hosi nia kliente Ricardo Cardoco Nheu antes ne’e ba parte rua.

Tuir lei, loloos MJ ho SETP iha obrigasaun hatán ba rekursu reklamasaun hosi nia kliente. Faktus rekursu reklamasaun nia kliente hato’o dala rua maibé laiha resposta. Tuir defeza nia intende, atetudi ne’e la di’ak ba ita nia nasaun demokrásia ne’e.

“Karik ami manán kazu ne’e laiha buat ida, maibé ami lakon ha’u sei halo asaun tuir lei haruka hasoru Ministru Justisa ho SETP, tanba sira la resposta ha’u nia kliente nia rekursu ne’ebé nia kliente hatama antes ona,” Defeza José Guterres ba jornalista sira iha Tribunál, Kinta (24/09).

Aleinde ne’e, advogadu privadu ne’e hatutan, nia sei halo asaun kriminál kontrola pessoál sira iha SETP  ida-idak nu’udar ema la’os reprezenta estadu, nune’e sira hatán failha sira komete durante eserse funsaun.

Responde ba preukupasaun defeza José Guterres, Sekretáriu Estadu Terras Propriedades (SETP), Jaime Xavier Lopez informa, kompeténsia atu hatán rekursu ba parte sé de’it maka hatama rekurus lamentasaun ba problema rai, sei responde hosi Ministériu Justisa.

Tan  ne’e, Governante ne’e esplika, tuir lei númeru 2-3 artigu 7, hosi lei númeru 1/2003 , bainhira liu loron sanulu resin lima laiha resposta hosi Ministériu Justisa ba parte ruma ne’ebé hatama sira nia rekursu reklmasaun ba problema rai,h atudu rekursu refere inferidu ona tanba Ministériu Justisa la aseita.

“Rekursu reklamasaun hosi eis Governante Ricardo Cardoco Nheu dala rua ne’e inferidu, tanba Ministériu justisa la aseita. Maibé, kompeténsia resposta refere hosi Ministru Justisa, tanba tuir lei rekursu reklamasaun liu ona loron sanulu resin lima, Ministériu Justisa la hatene. Hatudu katak rekurus refere inferidu,” hatán SETP Jaime Xavier Lopez liu-hosi telefone, Domingu (27/09).

Nia hatutan, rekursu hotu sobre lamentasaun ba rai, parte sira tenke hatama liu-hosi Ministériu Justisa ne’e tuir lei. La’os ba SETP. (Max)          

Timor Post