INACIO LA TOLERA KRIMINOSO IHA DNTT

DILI - Vise Ministru Obras Públika Transporte no Komunikasaun (MOPTK), Inácio  Moreira, afirma, la tolera funsionáriu DNTT nain rua ne’ebé polísia  Servisu Investigasaun Kriminal (SIKN) kaptura bainhira komete duni krime.

Funsionáriu Diresaun Nasional Transporte Terestre (DNTT) nain rua ida-idak ho naran inisial E.J.A hela iha Aldeia Rosariu, Suku Komoro no  AL  hela iha Bebonuk. Polísia kaptura suspeitu nain rua iha sira nia rejidénsia iha loron Segunda (04/04/2016) ho sasan evidénsia lubuk ida ne’ebé diskonfia falsifikasaun dokumentus no xapa matríkula kareta ho motor nian. Hafoin kaptura polísia sulan kedas ba sela.

“Ministériu  zero toleránsia  no la admiti ba aktu oknum funsionáriu balun ne’ebe diskunfia komete krime, karik iha investigasaun hatudu sira sala entaun tenki ba prizaun kumpri lei, ita la tolera funsionáriu ne’ebe mak servisu ba fali nia an,’’ dehan Inácio  ba jornalsista sira iha Caicoli, Kuarta  (05/04).

Inácio  hatete, antes ne’e sira halo ona reuniaun ho funsionáriu DNTT sira hodi esplika lalaok servisu no halo kna’ar  ho lolos i toma responsabilidade nia mós esplika katak, polísia  sira halo kapturasaun ne’e tuir mandadu husi tribunal tanba iha ona faktus balun hatudu ba funsionáriu nain rua ne’e komete ona eru balun.

To agora ministériu  seidauk hola medidas ruma, tanba prosesu investigasaun la’o  hela, maibé  Inácio  espera prosesu ne’e tenki la’o  to iha tribunal hodi hetan desizaun no karik sira sala tenki ba prizaun hodi nune’e bele fo esperesnia ba funsionáriu tomak inklui ajente Estadu nian hotu, tanba nasaun Timor Leste presija ema ne’ebe mak servisu ho responsabilidade.

Inácio  mós husu ba públiku   labele jeneraliza instituisaun, tanba la’ós instituisaun mak haruka sira komete krime, maibé  oknum sira servisu iha instituisaun ne’e mak mentalidade ladi’ak  hodi komete krime.

Iha fatin hanesan bainhira jornalista sira tenta konfirma ho Diretór  DNTT Natalino do Rosario maibé  nia lakohi fo komentáriu.

Antes ne’e, Komandante SIKN Superintendenti Rudgeiro Lay dehan, semana kotuk simu mandadu tolu hosi Tribunal hodi hala’o  operasaun ba sasan no mandadu detensaun ba suspeitu.

“Depois ita simu tenta buka paradeiru suspeitu nian, ita buka durante semana ida nia laran no ita hetan hodi segunda horisehik (hodibairua) ita ejekuta kedas mandadu ne’e,” dehan Rudgeiro ba Timor Post iha Kuartel Jeral PNTL, Kaikoli, Tersa (05/4).

Funsionáriu  nain rua ne’e antes ne’e, parte SIKN kaptura ona hodi halo investigasaun ba kazu ne’ebe maka hanesan, maibé  sira nain rua husik fali tanba evidénsia la forte no sira nain rua rasik halo karta Rejeita ida mai Timor Post katak sira nain rua la involve iha kazu falsifikasaun dokumentu ka karta kondusaun.  

PN husu Prosesa ba Tribunal

Entretantu membru Parlamentu Nasional (PN), Deputadu Paulino Monteiro afirma, tenke, prosesa ba Tribunal kuandu iha ona evidénsia.

“Kaer evidénsia forte ona lori ba iha Tribunal hodi rejolve tuir lei. Ida ne’e maka los liu,”informa membru komisaun E Parlamentu Nasional trata asuntu Infraestrutura, Trasnporte no Komunikasaun ba jornalista sira iha PN, Kuarta (6/4).

Iha fatin hanesan, membru PN, Deputadu Manuel Castro reforsa tan katak, kuandu iha ona evidénsia, tenke proses funsionáriu  nain rua ne’e ba Tribunal.

“Funsionáriu  nain rua ne’e kaer ona no iha ona evidénsia tenke lori ba Tribunal, iha ne’eba maka halo julgamentu. Sé sira sala  tenki kumpri sala ne’ebé sira halo,”informa membru bankada FRETILIN  ne’e.(way/jos)

Timor Post