Posibilidade Sidadaun Barak Sei la Vota iha Eleisaun Antesipada

DILI: Prespektiva husi Asosiasaun HAK katak, posibilidade boot iha Eleisaun Antesipada povu barak sei la ba vota.

Tanba Eleisaun normál ne'ebé realiza iha tinan 2017-2022, kuaze eleitór rihun atus rua (200.000) mak la ba vota.

“ita la bele muda tan ona desizaun ne’e. Tanba desizaun ne’e mak aas no di'ak liu ona.

Partidu sira hotu  hahú agora tenke haka'as aan  atu manan konfiansa povu nian nune’e bele ba vota” Diretór ezekutivu Asosiasaun HAK Manuel Monteiro hateten lia hirak ne’e ba Jornalista sira, iha ninia servisu fatin Faról, Sesta  (26/01).

Nia sujere ba  partidu polítiku sira, tenke garante ba povu katak EA ne’e eleisaun ida ne'ebé tuir duni prinsípiu demokrasia, eleisaun ida universál no ema hotu ne'ebé partisipa iha eleisaun ne’e tenke livre, laiha obrigasaun, terrór no intimidasaun.

Liu tan ida ne’e tenke esplika mós ba eleitór sira katak, ho EA  mak dalan di'ak liu ona atu hakotu krize polítika iha nasun ne’e.

Monteiro husu ba  partidu polítiku sira tenke husik ona interese partidária, fó fila fali ba povu atu hetan rezultadu ida di'ak atu bele kontinua forma fali oitavu governu tuir loloos sentidu demokrasia no laiha tan repetisaun hanesan akontese daudaun.  

“ha’u husu ba polítiku sira, atu soe do’ok ódiu, vingansa liu husi polítika ida agora daudaun ne’e, hanoin de’it destinu povu ne’e nian”, tenik nia.

Manuel preokupa liu tan bainhira modelu ukun na'in no lider polítiku sira mak kontinua ho hahalok arrogánsia, egoísta,  ódiu no vingansa, ninia rezultadu ikus mak sei repete fila fali situasaun hanesan agora daudaun.

Independente