DEZASTRE NATURAIS…!!!

Jornal Nacional Diário, editorial

Udan no anin boot nebe akontese iha semana ida nia laran, iha suku Defawasi, posto administrativu Baguia, Municipiu Baucau no suku Fatubesi, posto administrativo Hatolia, Muncipiu Ermera, resulta ema nain tolu mate no estraga uma komunidade nian 21.

“Ami simu  informasaun husi  munisipiu  hotu-hotu  katak, akontesimentu  mudansa  klimatika  anin ho udan bo’ot rejulta ema nai’in 2 mate iha Munisipiu Baucau, no iha Ermera ema 1 mak mate fatin, tanba ai tohar hanehan, Nomos informasaun ne’ebe mak ami simu iha dadersan  ne’e katak, iha munisipiu Manufahi  udan ho anin bo’ot halo estragus uma hamutuk  16, ne’ebe  kompostu uma 9 iha Suku  Tutuluro, no mos uma 7 iha Suku Holarua,”informa DNGDN-MSS,  Agustinho  Cosme  Belo.

Akontesimentu dezatre naturais iha fatin – fatin sira hanesan, governu iha ambitu nee, Ministeriu Solideriedade Sosial mak tenki servisu makaas liu tan atu bele responde neseidade vitima sira nian, li-liu apoia umanitariu ba vitima sira.

Dezastre naturais nee laiha ema ida mak espera, akontesimentu natureza nee derepenti deit nebe bele estraga habitasaun komunidade nian no mos halo ema mate, wainhira komunidade rasik la prepara an infrenta dezastre naturais nee.

Dezastre naturais nee laos foin primeira akontese maibe iha tinan hira kotuk ba nee, akontese inundasaun iha Viqueque, Baucau no Same hodi estraga natar agrikultor sira nian, mota lori komundade ida iha parte Suku Sagadate, posto administrativu Laga, Muncipio Baucau. Dezastra naturais nee nudar efeitu husi mudansa klimatika, tamba udan no anin lao la tuir ona ninia tempo normal. Tempo bainloron naruk, udan monu rai la tuir tempo normal, anin boot, aleinde estraga komunidade sira nia uma, hamate ema no mos bele provoka hamlaha iha tempo bainloron nian.

Akontesimentu dezastre sira nee hanesan prova ida hatudu katak mundansa sira iha relasaun ho tempo nebe iha relasaun ho mundansa klimatika, sei haboot posibilidade no intensidade ba dezastre naturais atu mosu iha rai laran tomak.

Timor Leste mos esprimenta  efetu siklu anomalia klimatika nebe relasionadu  ho Elnino. Inundasaun sei bele hamenus  produsaun agrikula , halo aat infra estruktura iha fatin sira nebe mosu inundasaun, komunidade sira lakon hela fatin, lakon riku soin no meus subsistensia.

Mundo ohin loron nee preokupa ho Mudansa Klimatika, ema sunu rai arbiru, tesi ai arbiru, halo rai molik, laiha reflorestasaun, falta okjizenu no carbono de oxida aumenta, hamosu akesimentu global ( pemanasan global).

Nasaun hotu hotu iha mundo, iha obrigasaun atu oinsa bele reduz akesimentu global. Durante nee Nasoens Unidas organiza ona enkontru bar-barak, konferensia bar-barak hodi halibur nasaun industrial sira konaba mundansa klimatika nian.

Akordu bar-barak asina ona, komesa protokolu kyoto, akrodo Paris- Fransa, maibe laiha nasaun ida mak implementa akordu nee. Tamba efeitu mundansa klimatika nee husi tinan ba tinan makaas liu tan, hodi nunee ONU realisa konfrensia iha Dinamarka hodi hamosu delakarasaun Copenhagen.

Nebe nasaun hotu hotu kompremetidu ba implementa akordu Copenhagen, konaba mundansa klimatika ninian. Timor Leste nudar país foun mos asina protokolu nee hodi kontribui ba hamenos mundansa klimatika nebe ohin loron afeita mundo tomak.*