quarta-feira, 14 de março de 2018

Lere Husu Lider Istóriku Sira Unidu


DILI, (TATOLI) – Eis lider rezisténsia atuál Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu ba lider istóriku sira hanesan Xanana Gusmão, Marí Alkatiri no Ramos Horta atu hamutuk (unidu) hateke ba oin hodi kontribui ba dezenvolvimentu Timor.

“Ha’u nia hakarak ne’e sira tenke hamutuk. Ida ne’e maka importante liu”, Lere hato’o ba jornalista sira iha Palásiu Prezidente Nicolau Lobato, Bairru Pité, kuarta ne’e, relasiona ho lider istóriku sira lakohi hamutuk maibé buka hatún malu de’it.

Nia dehan bainhira lider hirak ne’e kontinua hateke malu ho matan la moos, aban bainrua jerasaun foun mai aat liu.

“Ha’u bele garante katak bainhira lider sira ne’e la hamutuk, Timor sei la hakmatek. Uluk iha situasaun difísil imi (líder istóriku) hamutuk, tanbasá agora iha era ukun án no dezenvolvimentu nian imi fahe malu”, kestiona.

Iha oportunidade ne’e, Lere husu ba lider jerasaun foun sira atu labele aproveita situasaun fahe lider istóriku sira maibé hola papél ida hodi ezije lider sira tenke hamutuk.

“Jerasaun foun sira dalaruma lahatene istória Timor ninian, lahatene prosesu dezenvolvimentu libertasaun ninian, sira naran ko’alia de’it hodi fahe líder sira. Jerasaun foun sira loloos akumula lider istóriku sira hamutuk atu lori Nasaun ida ne’e ba oin”, apela lider Forsa Armada ne’e.

Jornalista: Xisto Freitas | Editora: Rita Almeida

Imajen: Majór Jenerál Lere Anan Timur dadalia ho jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, ohin. Foto Tatoli/Xisto Freitas

Sem comentários: