Partido Demokratiku Husu Povu Labele Faan Rai

NATARBORA: Estrutura Partidu Demokratiku (PD)  iha Postu Administrativu Natarbora Munisipiu Manatutu alerta ba povu tomak atu labele faan rai ba ema estrajeiru sira hodi utiliza ba komersiu nian.

Kandidatu membru governu Mateus Cabral hatete Manantutu liu liu iha postu Natarbora potensial tebes ba setor agrikultura, turismu, mineriu no petroleum tanba ne’e husu povu tomak tenke kuidadu rai ne’ebé ita hela ba.

“Ohin loron projetu tasi mane kona iha ita nia postu administrativu ema barak sei tama mai hodi investe iha ne’e tanba ne’e ita tenke kuidadu ita nia rai atu labele monu ba ema seluk nia liam” Dehan Mateus Cabral iha Natarbora horseik.

Mateus hatutan, Rai sai hanesan rikusoin ne’ebé bo’ot tebes ba ema tanba ne’e kuandu ema estranjeiru mai hakarak sosa labele fo maibé haruka sira bele aluga de’it.     

Partidu Demokratiku hanesan jerasaun kontinuador iha planu politika atu halo dezenvolvimentu hodi hadia povu no nasaun ida ne’e husik rai sira ne’e ba jerasaun sira atu utiliza hodi dezenvolve aan.

“ita iha natar, toos no plantasaun seluk ne’ebé presija governu atu hadia maibé kuandu imi faan hotu programa sira ne’e ita atu implementa iha ne’ebé” Dehan Mateus.

Iha fatin hanesan tuir Kandidatura ba membru Parlamentu Nasional Henriqueta da Silva hatete, rai sai hanesan rekursu importante tanba ne’e husu labele faan rai ba ema seluk.

“ita iha ona ona esperensia iha Dili uluk Hudi laran ohin loron sai ona sina laran tanba sina mak nakonu ona iha ne’eba tanba ne’e hau husu Natarbora labele sai fali sina laran,” Dehan Henriqueta.

Lígia Noronha | Independente