DILI, (TATOLI) - “Rai Dili rai
sidade sé mak la hatene. Se o la fiar karik hakat liu to’ok mai, akásia funan
buras halo Dili matak, rai Dili, rai sidade se mak liu tan o…”.
Fraze husi knananuk ho títulu
“Sidade Dili” ne’ebé kompozitór mak Anito Matos ne’e, lori Timoroan sira
hanoin hikas sidade Dili iha tinan 70 ba kotuk, ne’ebé Dili famozu tebes
ho nia ikónika mak ai-akásia.
Iha tinan 1970 nia klaran,
uainhira ema halo viajen mai
Dili husi lorosa’e kuandu to’o iha Fatu-Ahi tutun hateke mai Dili nakonu ho funan mean
iha entre fulan Outubru no Novembru nia klaran. Nune’e mós husi Ainaro no
Maubisi tun mai Dili
to’o iha Balibar leten hateke sidade Dili matak ho ai-akásia.
Ironia tebes. Akásia nudár
ikónika sidade Dili ne’e lakon nahas iha Timoroan nia futar matan husi tinan
entre tinan 1990 tanba la iha ema ida mak bele tau matan no próteze.
Mai
to’o ukun an ne’ebé restaura iha loron 20 Maiu 2002, seidauk iha inisiativa ne’ebé
bele lori hikas sidade Dili nia prestíjiu ne’e. Maibé, ohin, emprezária
Timoroan ne’ebé hamahan an iha Asosiasaun Emprezariál Feto Timor-Leste (AEMTL-sigla portugés)
komesa inisia kuda hikas akásia iha Dili laran atu bele hatuur hikas
sidade Dili nia ikónika.
AEMTL, Segunda (22/4/2019),
lansa ona programa kuda ai-akásia hamutuk hun 250, atu lori hikas ikónika
sidade Dili nian husi alvu kuda akásia hun 10.000 iha sidade Dili tomak
durante tinan ne’e.
Atividade kuda akásia ida ne’e
hahú husi Igreja Motaél nia oin hafoin marxa bá Largo Lesidere no to’o iha
Kristu Rei.
Prezidente AEMTL, Hergui Luina
Fernandes Alves, hateten, durante marxa ne’e AEMTL sei kuda akásia no fahe mós
ba abitante iha dalan para bele kobre mós área sira husi Motaél to’o Kristu
Rei.
“Aléinde fahe akásia oan, ami mós
sei fahe ho pamfletu kona-ba istória furak husi Dili nian au mezmu tempu fahe
mós informasaun kona-ba halo oinsá maka kuda no kuida akásia”, informa Hergui
Luina Fernandes Alves, hafoin kuda akásia iha area Motaél, Dili.
Hergui Luina salienta objetivu
husi atividade ne’e atu lori hikas ikónika kapitál Dili ne’ebé maka furak ho
akásia no mós hatudu interese AEMTL nian ba iha ambiente katak responsabilidade
maka kuida no konserva ambiente liuhusi kuda ai-oan.
Atu bele kuidadu akásia ne’e foin
kuda, Hergui hateten, nudar kampaña ne’ebé AEMTL halo mak ema ne’ebé kuda
akásia nia sei responsabiliza ba kuida ai-oan ne’ebé maka nia kuda tanba
bainhira fahe ai-oan ne’e fó mós pamfletu ne’ebé ko’alia kona-ba oinsá atu halo
tratamentu ba Akásia depois nia kuda.
“Ida ne’e responsabilidade ema
ida-idak nian. Bainhira ami fahe ba umakain ida akásia hun ida, umakain ida sei
responsabiliza bá akásia sira ne’ebé sira simu atu kuda distánsia hira husi uma
ne’e iha hotu pamfletu nia laran”.
Fini husi akásia ne’ebé maka
AMETL kuda ba loron ohin hamutuk 250 ne’e balun mai husi Munisípiu Dili, hun
100 husi Pelican Paradise no restu membru asosiasaun mak arranja.
AEMTL sei hala’o nafatin
atividade kuda akásia ne’e karik halo iha semana rua dala ida ka fulan ida dala
ida atubele atinje alvu atu kuda Ai-akásia iha tinan ida ne’e nia laran hamutuk
10.000 iha sidade Dili tomak.
Feto emprezariál sira ne’e halo
programa lori hikas ikónika sidade Dili ne’e tanba uluk sidade ne’e furak tebes
ho akásia ne’ebé maka nakonu, tanba ne’e atu kuida ai-hun ne’e, Hergui husu ema
hotu atu kuida planta saida de’it maka kuda ona.
“Aban bainrua sé maka sei tuur
iha akásia nia okos? Ita duni maka sei hetan mahon husi akásia sira ne’e”,
tenik Hergui Fernandes Alves.
Sekretáriu Estadu Kooperativa,
Arsénio Pereira da Silva, hatete iha tempu uluk avó sira-nian sidade ne’e
koñesidu ho akásia, tanba ne’e maka AEMTL hakarak inisia fali ikónika sidade
Dili nian atu bele mosu fali.
“Ne’e hanesan parte ida halo
revitalizasaun ba ai-akásia ne’e iha ita-nia sidade Dili. Ha’u mós kompromete
kedan katak ida ne’ebé ohin ha’u kuda, ha’u ho ha’u-nia funsionáriu
loraik-loraik antes fila sei mai tau-matan, mai rega, ita hatene agora atu
bailoro fali ona entaun tenke kuidadu para depois saida maka ita tau ba rai ida
ne’e tenke moris, buras para fó mahon no fó ár (anin) ba sidade Dili”, Arsénio
afirma.
Atividade kuda akásia ne’e hetan
prezensa husi Prezidente Kámara Komérsiu Indústria (CCI-TL, sigla portugés),
Óscar Lima, reprezentante husi Sekretária Estadu Igualdade no Inkluzaun no
Organizasaun Naun Governamentál sira.
Ai-horis akásia tama iha grupu
ai-hun ne’ebé boot ho nia espésie oioin liu rihun ida. Akásia nu’udar ai ne’ebé
fó funan barak no bele moris iha klima manas ka iha zona tropikál. Iha
Timor-Leste, nia formatu koñesidu hanesan guarda-xuva ne’ebé haburas sidade
Dili iha tempu uluk.
Faktu katak Dili nia paizajen
uluk maka ai-akásia no konsidera nu’udar patrimóniu turístiku no kulturál, mas
ikónika ai-akásia ida ne’e lakon husi tempu ba tempu.
Jornalista: Maria Auxiliadora | Editór:
Francisco Simões
Imajen: Sekretáriu Estadu ba
Kooperativa Arsénio Pereira da Silva Akompaña husi Presidente Associação
Empresarial das mulheres de Timor - Leste ( AEMTL) Hergui L.F. Alves no
Presidente Camâra de Comércio e Indústria de Timor-Leste (CCI-TL) Oscar Lima
hodi Kuda Ai oan iha Jardim Motael oin.Imajen/Egas Cristovão
Sem comentários:
Enviar um comentário