DILI, (TATOLI) - Ministériu
Reforma Lejizlativa no Asuntu Parlamentár (MRLAP) sei halo konsultasaun ho lia
na’in husi étniku hotu iha territóriu Timor-Leste kona-ba lei
diretu kostumeiru ka lei justisa tradisionál hodi hetan rekoñesimentu hosi
estadu atu lori justisa ba povu.
Ministru Reforma Lejizlativa no
Asuntu Parlamentár, Fidelis Manuel Leite Magalhães hatete, konsulta
públiku ne’e sei realiza depois fulan Abril remata hodi involve mós ekipa husi
Ministériu Justisa, Provedoria dos Diretu Umanus no Justisa (PDHJ-sigla portugés),
Defensoria Públika no seluk tan.
Objetivu hosi konsultasaun ne’e
atu hetan rekomendasaun no sujestaun husi lia na’in sira hodi tulun governu atu
hakerek lei ne’e hodi hetan legalizasaun hosi estadu.
“Hodi konsulta ho grupu étniku
iha territóriu hodi ko’alia ho lia na’in sira hodi rekolla rekomendasaun no
hanoin ba lei kostumeiru ka lei tradisionál”, esplika Ministru Fidelis
Magalhães ba Jornalista sira iha Palásiu Governu, Kuarta (17/4/2019).
MRLAP prepara ona modelu rua husi
ezbosu lei ne’e maka ida halo integrasaun total husi sistema justisa
tradisionál ne’e ba justisa formal no modelu ida seluk maka kria
rekoñesimentu ba mekanizmu tradisionál no presiza de’it hetan
rekoñesimentu husi justisa formal bainhira rezolve problema sosiál ida iha
komunidade nia leet.
Bainhira lei ne’e implementa ona,
Ministru Fidelis Magalhães fiar katak, sei ajuda redús kazu pendente barak iha
tribunal hodi fó justisa loloos ba povu ho durasaun tempu ida lais atu hamosu
tan disputa naruk hodi hamosu konflitu ida boot liu.
Ministru Fidelis Magalhães
konsidera sistema justisa tradisionál ne’e sei ajuda lori justisa to’o ba
komunidade nia leet. Tanba iha lei ne’e sei fó definisaun loloos atu rezolve
tipu krime no problema sosiál saida maka bele rezolve, porezemplu disputa rai,
violénsia doméstika, konflitu ki’ik sira entre joven, tara bandu no seluk tan.
Jornalista: Agapito dos Santos | Editór:
Francisco Simões
Imajen: Ministru Reforma
Lejizlativa no Asuntu Parlamentár, Fidelis Manuel Leite Magalhães.
Imajen/Antonio Gonçalves
Sem comentários:
Enviar um comentário