Komando hosi forsa armada sira
destaka ona, iha loron-tersa ne'e, kontijente ki'ik ida hosi militar sira iha
dalan hosi sede movimentu ida nian ne'ebé iha semana ne'e hakarak halo
manifestasaun hasoru Prezidente Repúblika tanba alegadu violasaun hasoru
Konstituisaun.
Militar armadu sira destaka iha
pontu tolu hosi dalan Água da Fonte, iha besik palásiu Governu, ne'ebé situa
sede hosi Partidu Traballista (PT), lidera hosi Ângela Freitas.
Ângela Freitas hanesan porta-vós
ida hosi movimentu polítiku ida ne'ebé foin harii ne'ebé hetan ameasa tama iha
kadeia hosi komandante Forsa Defeza Timor-Leste (F-FDTL) nian, major jeneral
Lere Anan Timor, tanba promove asaun protestu.
Iha deklarasaun sira ba Lusa,
Ângela Freitas hatete katak agora sei la ba sede partidu nian, tanba hala'o
hela diálogu ho polísia nasional ho Ministériu Públiku tanba konsidera hanesan
"asaun ida intimidasaun nian" hosi komandante militar.
"Ami rona deklarasaun sira
hosi komandante Lere. Ameasa sira ne'e ba ema sivil ida hanesan krimi ida. Ita
iha nasaun demokrátiku ida no ha'u iha direitu tomak hodi hatudu ha'u nia
insatisfasaun ba saida maka ha'u konsidera hanesan violasaun sira hasoru
Konstituisaun", nia hatete ba Lusa.
"Ha'u la tauk maibé ha'u
tenki hein atu ko'alia ho autoridade sira seluk antes fila ba sede", nia
hatutan.
Ângela Freitas konsidera ona
katak destakamentu hosi militar sira iha besik sede hosi nia partidu konfigura
"komportamentu ida ditadura nian ho forsa militar sira ne'ebé hanesan
perigozu tebes iha nasaun demokrátiku ida".
Xefe F-FDTL ameasa ona, iha
loron-tersa ne'e, atu kaer dirijente sira hosi movimentu foun ne'ebé hakarak
hodi halo manifestasaun iha semana ne'e hasoru Prezidente Repúblika.
Iha deklarasaun sira ba
jornalista sira, oras antes hosi destakamentu militar sira iha besik sede
partidu nian, Lere Anan Timur reaje nune'e ba protestu ne'ebé maka planu hela
hosi grupu foun timoroan ida ne'ebé defende rezignasaun hosi Prezidente
Repúblika, konsidera katak xefe Estadu la respeita Konstituisaun no halo asaun
hodi defende interese sira hosi nia forsa polítika rasik.
Grupu "Rezisténsia Nasional
hosi Defeza Justisa ho Konstituisaun Timor-Leste nian", lidera hosi Ângela
Freitas ho Antonio Ai-tahan Matak, sirkula petisaun ida iha sentidu ne'e no
prevista "marxa pasífiku" ida, ne'ebé hetan ona autorizasaun hosi
polísia, iha loron-sesta oinmai.
"Prezidente viola ona
konstituisaun no tenki rezigna", Ângela Freitas, porta-vós hosi movimentu,
hatete ba Lusa.
Grupu akuza Francisco Guterres
Lu-Olo halo asaun hodi defende nia partidu, Frente Revolucionária do
Timor-Leste Independente (Fretilin), duké defende populasaun tomak, bainhira la
fó pose ba membru oioin hosi partidu koligasaun boot ne'ebé manán eleisaun
tinan 2018, Congresso Nacional da Reconstrução Timorense (CNRT), hosi Xanana
Gusmão.
"Prezidente tuir loloos halo
asaun nu'udar xefe Estadu ba povu tomak. Maibé nia halo asaun hodi defende
partidu ne'ebé nia lidera", nia akuza.
"Prezidente Repúblika viola
ona regra sira demokrasia nian. Nia la aseita fó pose ba kuadru prinsipal sira
hosi CNRT, ne'ebé hanesan partidu boot hosi Aliansa Mudansa ba Progresu (AMP),
ne'ebé manán eleisaun iha tinan 2018", nia refere.
Lere Anan Timur konsidera hanesan
la aseitável ezijénsia sira hodi hatún Prezidente.
"Nu'udar veteranu hosi tinan
24 rezisténsia nian no komandante F-FDTL nian, ha'u la permiti grupu ruma ka
organizasaun ruma atu halo asaun ida golpe nian hasoru líder sira rezisténsia
nian", Lere Anan Timur hatete hodi refere ba naran istóriku balun hanesan
Xanana Gusmão, Taur Matan Ruak (atual primeiru-ministru) ka Francisco Guterres
Lu-Olo (Prezidente).
Lere Anan Timur hatete ona katak
"Governu tuir loloos la simu ema ida" hanesan Ângela Freitas, rekorda
problema sira ne'ebé maka nasaun hasoru iha tinan 2006.
"Ha'u sei la husik ema ruma
halo destituisaun hosi ha'u nia maun-alin sira ne'ebé komanda ona
guerilla", nia hatete.
"Bainhira asaun pasífiku
hosi grupu hamosu krimi balun, ha'u rasik sei lori forsa sira hodi prende
lideransa máximu tomak ne'ebé organiza ona asaun ne'e. Ha'u sei haruka prende
Ângela ho Ai-tahan Matak. Bainhira sira hakarak hatún 'katuas' sira liuhosi
manifestasaun ida, ha'u haruka forsa sira atua no ha'u sei responsabiliza rasik
hodi hatán iha tribunal no ba direitu ema sira nian", nia ameasa.
Lere Anan Timur hatutan ona katak
Prezidente Repúblika eleitu hosi votu no destituisaun ruma tenki tuir dalan
sira ne'ebé defini iha lei.
Komentáriu sira hosi líder
militar hamosu komentáriu krítiku sira iha rede sosial sira, ho ema barak
defende direitu ba manifestasaun ho insisti atu entidade responsável hodi
kontrola asaun sira hanesan ne'e maka polísia no la'ós forsa armada sira.
Sapo TL | Lusa
Sem comentários:
Enviar um comentário